जळगाव प्रतिनिधी । मेडिकल दुकानावर औषधी घेण्यासाठी जात असलेल्या अल्पवयीन मुलीला रस्त्यात अडवून ‘आय लव्ह यु’ म्हणून विनयभंग केल्याप्रकरणी तरूणावर एमआयडीसी पोलीस ठाण्यात विनयभंग व बाललैंगिक कायद्यान्वये गुन्हा दाखल करण्यात आला आहे.
अमृत उर्फ आबा सखाराम वाणी (३२, रा. इच्छा देवी चौक, जळगाव) असे संशयित आरोपीचे नाव आहे. याबाबत पोलिसांनी दिलेली माहिती अशी की, दहावीच्या वर्गात शिक्षण घेत असलेली १६ वर्षीय मुलगी मंगळवारी सकाळी ९.३० वाजता शामा फायर कॉम्लेक्समधील मेडिकल दुकानावर औषधी घेण्यासाठी जात असतांना संशयित आरोपी अमृत याने तिच्याकडे पाहून ‘आय लव्ह यु’ म्हणाला. पीडित मुलीने प्रारंभी याकडे दुर्लक्ष केले. सरळ मेडिकल दुकानावर गेली. तेथून परत येत असताना पुन्हा अमृत याने जोरात आवाज काढून ‘आय लव्ह यु’ म्हटला आणि इतक्यावरच न थांबता त्याने मुलीचा हात पकडला. हा प्रकार पाहून घाबरलेल्या मुलीने धावत जावून आजीला हा प्रकार सांगितला. आजी व इतर नातेवाईकांनी अमृतचे घर गाठून जाब विचारला असता मी काहीच बोललो नाही असा पवित्रा घेतला. दरम्यान, रात्री उशिरा एमआयडीसी पोलीस गाठून तक्रार दिली. मानव संसाधन विभागाच्या सपोनि सुनंदा पाटील यांनी पीडित बालिकेचा जबाब नोंदविला. त्यानंतर अमृत वाणी याच्याविरुध्द विनयभंग व बालकांचे लैंगिक शोषणापासून संरक्षण कायद्याविरुध्द गुन्हा दाखल करण्यात आला. दरम्यान, गुन्हा दाखल झाल्यानंतर कॉन्स्टेबल अशोक सनगत, नितीन पाटील, लुकमान तडवी, इमरान बेग व शांताराम पाटील यांनी वाणी याचा शोध घेतला व रात्री उशिरा ताब्यात घेऊन बुधवारी सकाळी अटक केली. तपास उपनिरीक्षक गणेश कोळी करीत आहेत.
