पाचोरा, प्रतिनिधी । भारतीय जनता पार्टीने भडगाव प्रकरणात भाजपाने स्व.राणे यांच्या मृत्यूचे राजकारण थांबवून भ्रष्ट अधिकारी धामोरे याच्या विरोधात सदोष मनुष्यवधाचा गुन्हा कसा दाखल करता येईल यासाठी प्रयत्न करावेत असा उपरोधिक सल्ला शिवसेनेचे पाचोरा शहर प्रमुख किशोर बारावकर यांनी प्रसिद्धीस दिलेल्या पत्रकात दिला आहे.
पत्रकात त्यांनी पुढे म्हटले आहे की, महावितरणच्या विविध कर्मचारी संघटनांनी अभियंता धामोरे यांच्यावर अविश्वास व्यक्त करत प्रसिद्धी पत्रक काढत सत्य घटना कथन केली आहे. त्यानुसार सोमवार दि. ७ जून रोजी शिवसेनेने पाचोरा विभागातील सर्व कार्यालयांना व उपकेंद्रांना ‘ताला ठोको’ आंदोलन केले. हे आंदोलन शांततेत समाप्त झाल्यानंतर म्हणजे सुमारे १२:४५ वाजता काही अज्ञात लोकांनी उपविभागीय कार्यालयात तोडफोड केली व उपकार्यकारी अभियंताना यांना मारहाण केली इतपत हे सत्य आहे. परंतु, कै. गजानन राणे हे भांडणं सोडविण्यासाठी गेले व त्याच्यात त्यांचा मृत्यू झाला हे साफ चूकीचे व खोटे आहे. सत्य परिस्थिती अशी आहे की, उपकार्यकारी अभियंता यांना मारहाण झाली तेव्हा कै. राणे हे काही सहकाऱ्यांसोबत उपविभागात होते. अज्ञात मारेकरी हे जेव्हा बाहेर आले तेंव्हा उपकार्यकारी अभियंता धामोरे हे मारेकऱ्यांचा पाठलाग करत होते. त्यांच्या मागे उपविभागातील काही कर्मचारी पण होते व त्यामध्ये राणे पण होते. मारेकरी फरार झाल्यानंतर राणेंची तब्येत बिघडली व शवविच्छेदन रिपोर्टमध्ये राणेंना हृदयविकाराचा धक्का बसून त्यांचा मृत्यू झालेला आहे असे निर्देशीत केलेले आहे. अभियंता संघटनेने आपल्या चारही संघटनेची दिशाभुल करून आपला पाठिंबा मिळवून दि. ८ जून रोजी गेटमीटींग करून घेतली व तेथे भासविण्यात आले की, कै राणेंचा मृत्यू हाणामारीत झालेला आहे व तशी खोटी तक्रार पोलीस स्टेशनला दाखल करण्यात आली. याबाबतची सत्यता भडगाव उपविभागातील कर्मचाऱ्यांना माहीत आहे. खोटी तक्रार दाखल केल्यामुळे ग्राहकांचा व शिवसेनेचा आपल्या कर्मचाऱ्यांकडे पहाण्याचा दृष्टीकोन बदलण्याची शक्यता आहे व कर्मचारी हे दहशतीत व भांबावलेले आहेत. तरी आपण चारही संघटनेच्या पाचोरा व जळगाव झोनच्या पदाधिकारी यांच्यासोबत बैठक करून सत्य कहाणी ही समाज माध्यमांना देऊन आमचा चारही संघटनेच्या सभासदांचा या घटनेशी काहीही संबंध नाही असे निर्देशीत केले आहे. तेव्हाच आपल्या सभासंदाकडे पहाण्याचा दृष्टीकोन बदलावा लागेल अशी भूमिका घेतली आहे. अमोल शिंदे यांनी कोविड केअर सेंटरमध्ये भागीदारी करत कोरोना सारख्या परिस्थितीमध्ये जनतेची लूट केली आहे. त्यामुळे त्यांना जनतेचा किती कळवळा आहे हे सर्वांना कळते. भोळ्या भाबड्या भडगावकरांची दिशाभूल करू नये असा गर्भित इशारा प्रसिद्धी पत्रकात शेवटी दिला आहे. प्रसिद्धी पत्रकावर शेतकरी सेनेचे जिल्हा प्रमुख अरुण पाटील, पाचोरा तालूका प्रमुख शरद पाटील यांचेसह शिवसेना शहर प्रमुख किशोर बारावकर यांच्या सह्या आहेत.
