जळगाव-लाईव्ह ट्रेंड्स न्यूज प्रतिनिधी । जागतिक होमिओपॅथी दिनानिमित्त जळगाव येथे टीम अॅफोरिझम (Chapter II) तर्फे भव्य आणि उत्साहपूर्ण कार्यक्रमाचे आयोजन करण्यात आले. या कार्यक्रमात होमिओपॅथी क्षेत्रात उल्लेखनीय कार्य करणाऱ्या मान्यवर डॉक्टरांचा सत्कार करण्यात येत त्यांच्या योगदानाचा गौरव करण्यात आला.
या प्रसंगी जळगाव येथील डॉ. महेंद्र काबरा, डॉ. रुपेश पाटील, डॉ. स्मिता पाटील, डॉ. संजय पाटील तसेच चिनावल येथील डॉ. रवींद्र भारंबे आणि डॉ. सूर्यकिरण वाघांण्णा यांना सन्मानचिन्ह व प्रमाणपत्र देऊन सन्मानित करण्यात आले. त्यांच्या कार्याची दखल घेत उपस्थितांनी टाळ्यांच्या गजरात त्यांचे अभिनंदन केले.
कार्यक्रमाला प्रमुख पाहुणे म्हणून जळगावच्या महापौर मा. सौ. दीपमाला काळे, गोदावरी होमिओपॅथी कॉलेजचे अध्यक्ष डॉ. उल्हास पाटील, चामुंडामाता होमिओपॅथी कॉलेजचे अध्यक्ष पी. ई. तात्या पाटील तसेच शासकीय वैद्यकीय महाविद्यालय, जळगावचे अधिष्ठाता मा. डॉ. पराग भागवत यांची मान्यवर उपस्थिती लाभली. त्यांच्या उपस्थितीमुळे कार्यक्रमाची शोभा अधिकच वाढली.
प्रमुख पाहुण्यांच्या उपस्थितीत कार्यक्रमाची सुरुवात उत्साहात झाली. जळगाव जिल्ह्यातील शेकडो होमिओपॅथ डॉक्टर तसेच विविध होमिओपॅथिक वैद्यकीय महाविद्यालयांतील विद्यार्थी मोठ्या संख्येने उपस्थित होते. यामुळे कार्यक्रमाला विशेष ऊर्जा आणि उत्साह प्राप्त झाला.
यावेळी मान्यवरांनी होमिओपॅथीच्या महत्त्वावर सविस्तर भाष्य करत समाजातील आरोग्यसेवेत या पद्धतीचे योगदान अधोरेखित केले. तसेच विद्यार्थ्यांना या क्षेत्रात प्रामाणिकपणे आणि निष्ठेने कार्य करण्यासाठी प्रेरित केले. कार्यक्रमाचे सूत्रसंचालन डॉ. तृप्ती बढे यांनी केले, तर कार्यक्रमाच्या शेवटी डॉ. अपर्णा वाणी यांनी उपस्थितांचे आभार मानले.
हा कार्यक्रम यशस्वी करण्यासाठी डॉ. कमलेश मराठे आणि डॉ. प्रणय वाणी यांनी विशेष परिश्रम घेतले. त्यांच्या नियोजनामुळे कार्यक्रम सुरळीत आणि प्रभावीपणे पार पडला.
