मुक्ताईनगर-लाईव्ह ट्रेंड्स न्यूज प्रतिनिधी । दीपावली सणाचे औचित्य साधून मुक्ताईनगर येथील सौ. तु. ल. कोळंबे प्राथमिक विद्यामंदिरात विद्यार्थ्यांसाठी आकाशकंदील निर्मिती कार्यशाळेचे आयोजन करण्यात आले. २४ ऑक्टोबर २०२६ रोजी झालेल्या या कार्यशाळेत विद्यार्थ्यांनी उत्स्फूर्त सहभाग घेत आपल्या कल्पकतेला आणि सर्जनशीलतेला कलात्मक रूप दिले. विद्यार्थ्यांमध्ये स्वावलंबन, नावीन्यपूर्ण विचार आणि प्रत्यक्ष कृतीतून शिकण्याची आवड निर्माण व्हावी, हा या उपक्रमामागील प्रमुख उद्देश होता.
कार्यशाळेची सुरुवात शाळेच्या मुख्याध्यापिका श्रीमती चित्रा भारंबे यांच्या प्रेरणादायी मार्गदर्शनाने झाली. त्यांनी विद्यार्थ्यांना दीपावली सणाचे महत्त्व समजावून सांगितले. सणाच्या निमित्ताने बाजारातून सजावटीच्या वस्तू खरेदी करण्यासोबतच स्वतःच्या हातांनी आकर्षक वस्तू तयार करण्याचा आनंदही विद्यार्थ्यांनी अनुभवावा, असे त्यांनी सांगितले. अशा उपक्रमांमुळे विद्यार्थ्यांच्या कलागुणांना वाव मिळतो आणि त्यांच्या व्यक्तिमत्त्वाचा सर्वांगीण विकास होण्यास मदत होते, असेही त्यांनी स्पष्ट केले.
या कार्यशाळेचे संपूर्ण नियोजन कार्यशाळेच्या अध्यक्षा श्रीमती वंदना भालशंकर यांनी केले. श्रीमती प्रणिता चौधरी यांनी विद्यार्थ्यांना आकाशकंदील तयार करण्याचे प्रात्यक्षिक दाखवून प्रत्येक टप्प्यावर मार्गदर्शन केले. साहित्याची निवड, रंगसंगती, सजावट आणि आकाशकंदिलाची आकर्षक रचना याबाबत त्यांनी विद्यार्थ्यांना माहिती दिली. त्यांनी स्वतः सुंदर आकाशकंदील तयार करून विद्यार्थ्यांसमोर आदर्श ठेवला. त्यांच्या मार्गदर्शनामुळे विद्यार्थ्यांना आकाशकंदील निर्मितीची प्रक्रिया प्रत्यक्ष अनुभवता आली. कार्यशाळेच्या यशस्वी आयोजनासाठी श्री. सचिन वराडे आणि श्री. मनोज राठोड यांनी मोलाचे सहकार्य केले. तसेच शाळेतील सर्व शिक्षकांनी आपापल्या वर्गातील विद्यार्थ्यांना मार्गदर्शन करत त्यांच्या कल्पनांना प्रोत्साहन दिले. विद्यार्थ्यांनी उत्साहाने विविध प्रकारचे आकाशकंदील तयार करण्याचा प्रयत्न केला. या उपक्रमामुळे शाळेच्या परिसरात सणासुदीचे आनंददायी वातावरण निर्माण झाले.
शैक्षणिक अभ्यासासोबतच अशा हस्तकला उपक्रमांना महत्त्व दिल्याने विद्यार्थ्यांमध्ये सर्जनशीलता, कल्पकता, स्वावलंबन, संयम आणि सहकार्याची भावना विकसित होण्यास मदत होते. स्वतःच्या हातांनी एखादी वस्तू तयार केल्यामुळे विद्यार्थ्यांचा आत्मविश्वास वाढतो. तसेच समूहामध्ये काम करताना एकमेकांना मदत करणे, नवीन कल्पना मांडणे आणि उपलब्ध साहित्याचा कल्पकतेने वापर करणे यांसारखी कौशल्येही विकसित होतात. त्यामुळे विद्यार्थ्यांचे शालेय जीवन अधिक आनंददायी आणि अनुभवसमृद्ध बनते. या उपक्रमाबद्दल संस्थेच्या चेअरमन ॲड. रोहिणीताई खडसे, उपाध्यक्ष श्री. नारायण चौधरी, सचिव डॉ. सी. एस. चौधरी, शाळेच्या स्कूल कमिटीचे अध्यक्ष श्री. पुरुषोत्तम भाऊ महाजन तसेच सदस्य श्री. महेश पाटील यांनी विद्यार्थी आणि शिक्षकांचे कौतुक केले. विद्यार्थ्यांच्या सुप्त कलागुणांना वाव देणारे आणि त्यांच्या सर्जनशीलतेला प्रोत्साहन देणारे नावीन्यपूर्ण उपक्रम शाळेत राबविले जात असल्याबद्दल त्यांनी समाधान व्यक्त केले.
