अमळनेर-लाईव्ह ट्रेंड्स न्यूज प्रतिनिधी । महाराष्ट्राच्या राजकारणाला मोठा धक्का देणाऱ्या बारामती येथील दुर्दैवी विमान अपघातात उपमुख्यमंत्री अजितदादा पवार यांच्या निधनानंतर राज्यभरातून शोकसंदेशांचा ओघ सुरू असताना माजी मंत्री तथा अमळनेरचे आमदार अनिल भाईदास पाटील यांनी अत्यंत भावनिक शब्दांत आपल्या भावना व्यक्त केल्या आहेत. “माझा आनंद हरपला,” या शब्दांत त्यांनी आपल्या राजकीय मार्गदर्शकाला श्रद्धांजली अर्पण करताना दादांनी दिलेल्या नवजीवनाची आठवण जागवली.
अनिल पाटील यांनी आपल्या निवेदनात सांगितले की, राजकीय आयुष्यात दोन वेळा विधानसभा निवडणुकीत पराभव झाल्यानंतर आपण अक्षरशः राजकीय अंधारात होतो. पराभवाच्या मालिकेमुळे आर्थिक अडचणी वाढल्या होत्या, व्यवसायात संकटे होती आणि मनोधैर्य पूर्णतः खचले होते. अशा कठीण काळात अजितदादा पवार यांच्या संपर्कात आलो आणि पहिल्याच भेटीत त्यांनी माझ्या मनातील घालमेल ओळखत पाठीवर हात ठेवून लढण्याचे बळ दिले. “तो हात म्हणजे माझ्यासाठी ईश्वरी आशीर्वाद होता,” असे सांगत त्यांनी दादांप्रती कृतज्ञता व्यक्त केली.
त्यावेळी राजकीय समीकरणे बदलत असताना केवळ अजितदादांच्या नेतृत्वावर विश्वास ठेवून राष्ट्रवादी काँग्रेस पक्षात प्रवेश केला आणि कार्यकर्त्यांनाही सोबत घेतले. त्यानंतर जनतेच्या आशीर्वादाने अमळनेर मतदारसंघातून आमदार होण्याचा मान मिळाला. पक्षाने मुख्य प्रतोदपदाची जबाबदारी दिली आणि पुढे सत्तेत आल्यानंतर कॅबिनेट मंत्रीपदाचा सन्मान देत एका सामान्य कार्यकर्त्याला मोठे व्यासपीठ दिले, असे त्यांनी नमूद केले.
दादांच्या पाठबळामुळे अमळनेर तालुक्यासाठी जीवनदायी ठरणाऱ्या निम्न तापी पाडलसरे धरण प्रकल्पाला गती देणे शक्य झाले. कोट्यवधी रुपयांची विकासकामे मतदारसंघात राबविता आली. राज्य पातळीवरील विविध पदांची जबाबदारी देऊन दादांनी आपल्याला सक्षम नेतृत्वात घडवले. 2024 च्या विधानसभा निवडणुकीत दुसऱ्यांदा आमदारकीचा बहुमानही त्यांच्या आशीर्वादामुळेच मिळाल्याचे त्यांनी अधोरेखित केले.
घटनेच्या आदल्या दिवशी मुंबईत दादांची भेट झाली होती, अनेक सकारात्मक चर्चा झाल्या होत्या; मात्र नियतीने खेळ केला आणि ती भेट अखेरची ठरली. “दादा कायमचे नॉट रीचेबल झाले,” या शब्दांत त्यांनी आपल्या वेदना व्यक्त केल्या. 28 जानेवारी 2026 हा दिवस महाराष्ट्राच्या इतिहासातील काळा दिवस ठरल्याचे त्यांनी म्हटले.
अजितदादा हे केवळ उपमुख्यमंत्री नव्हते, तर अहोरात्र जनतेसाठी झटणारे एक यंत्र होते. पहाटेपासून मध्यरात्रीपर्यंत काम करणारे, स्पष्टवक्ते, प्रशासनावर वचक असलेले आणि शब्दाला जागणारे नेता म्हणून त्यांची ओळख होती. “अनिल, तू काम कर, मी तुझ्या पाठीशी आहे,” हा त्यांचा आवाज आता कायमचा शांत झाला, याची खंत त्यांनी व्यक्त केली.
दादांच्या निधनामुळे विकासाचा महामेरू कोसळल्याची भावना त्यांनी मांडली. या कठीण प्रसंगी पवार कुटुंबीयांच्या दुःखात सहभागी होत सुनेत्रा वहिनी, पार्थ आणि जय यांना धीर देण्याची प्रार्थना त्यांनी व्यक्त केली. दादांनी दाखवलेला विकासाचा मार्ग आणि त्यांचे विचार पुढे नेण्याचा संकल्प त्यांनी केला.
एकूणच, राजकीय अंधारातून उभारी देणाऱ्या नेत्याच्या निधनाने वैयक्तिक तसेच राजकीय आयुष्यातील आधारस्तंभ हरपल्याची भावना व्यक्त करत अनिल पाटील यांनी अजितदादा पवार यांच्या स्मृतीस विनम्र अभिवादन केले आहे.
