रावेर-लाईव्ह ट्रेंड्स न्यूज प्रतिनिधी | रावेर तालुक्यातील अजंदे शिवारात भरधाव ट्रॅक्टर पलटी होऊन झालेल्या अपघातात चालकाचा जागीच मृत्यू झाल्याची दुर्दैवी घटना घडली. या प्रकरणी रावेर पोलीस ठाण्यात अपघाताचा गुन्हा दाखल करण्यात आला आहे.
सावदा येथील भीमराव मेढे यांच्या मालकीचे (MH 19 P 4468) हे ट्रॅक्टर घनश्याम हरणकर (विवरा, ता. रावेर) यांच्या माती वाहतुकीच्या कामावर लावण्यात आले होते. ट्रॅक्टर चालक विजय रमेश तायडे (वय 45) आज सकाळी विवराहून अजंदेकडे भरधाव वेगाने जात असताना पांडुरंग शिवदास पाटील यांच्या शेताजवळ नियंत्रण सुटले. ट्रॅक्टर रस्त्याच्या डाव्या बाजूला असलेल्या लोखंडी अँगलला धडकल्याने पलटी होऊन विजय तायडे यांचा जागीच मृत्यू झाला.
या घटनेची माहिती ट्रॅक्टर मालक भीमराव मेढे यांनी रावेर पोलीस ठाण्यात दिली असून, यावर अपघाताचा गुन्हा दाखल करण्यात आला आहे. पुढील तपास पोलीस उपनिरीक्षक घनश्याम तांबे करीत आहेत.
