जळगाव-लाईव्ह ट्रेंडस न्यूज प्रतिनिधी । जळगाव शहरातील गणपती नगरामध्ये एका कुरियरवाल्याच्या पार्सलच्या बॅगमधून दोन पार्सल चोरून नेण्याची घटना मंगळवारी १७ डिसेंबर रोजी दुपारी १२ वाजेच्या सुमारास घडल्याचा प्रकार समोर आला आहे. दुचाकीवरील पार्सलच्या बॅगमधून चोरी करताना चोरटा सीसीटीव्ही कॅमेरात कैद झालेला आहे. यासंदर्भात रामानंदनगर पोलीस ठाण्यात तक्रार देण्यात आली आहे.
याबाबत अधिक माहिती अशी की, प्रशांत युवराज पवार वय-३७, रा.पिंप्राळा, जळगाव हा तरुण कुरिअर वाटप करण्याचे काम करतो. नेहमीप्रमाणे मंगळवारी १७ डिसेंबर रोजी दुपारी १२ वाजता दिवसातील पहिलेच पार्सल देण्यासाठी गणपती नगरात गेला होता. त्यावेळी कुरिअरवाला प्रशांत पवार यांनी त्याची दुचाकी घराच्या बाहेरच लावली होती. दरम्यान, रस्त्यावरून जाणाऱ्या अज्ञात व्यक्तीने त्यांच्या पार्सल ठेवलेल्या बॅगेतून जवळपास अंदाजे १० हजार रुपये किमतीचे दोन पार्सल ज्यात टी-शर्ट आणि जॅकेट होते ते चोरून नेले. दरम्यान हा संपूर्ण प्रकार नजीकच्या सीसीटीव्ही कॅमेऱ्यात कैद झालेला आहे. याप्रकरणी प्रशांत पवार यांनी रामानंदनगर पोलीस ठाण्यात धाव घेऊन तक्रार दिलेली आहे.
