धरणगाव-लाईव्ह ट्रेंडस न्यूज प्रतिनिधी । धरणगाव तालुक्यातील पाळधी गावात पोलीस पथकाला धक्काबुक्की करत शासकीय कामात अडथळा निर्माण केल्याची घटना घडली आहे. याप्रकरणी पाच जणांविरोधात गुन्हा दाखल करण्यात आला आहे.
जळगाव तालुका पोलीस ठाण्याचे पोलीस कर्मचारी १८ फेब्रुवारी रोजी रात्री ९ वाजता धरणगाव तालुक्यातील पाळधी गावात एका गुन्ह्यातील संशयित आरोपी आणि अल्पवयीन मुलीचा शोध घेण्यासाठी गेले होते. घरात शोध घेत असताना महिला पोलीस कॉन्स्टेबल योगिता पाचपांडे यांच्यासह पोलीस पथकाला संशयित आरोपी भारती राहुल सोनवणे, प्रियंका किशोर सोनवणे, मीराबाई युवराज सोनवणे, राहुल युवराज सोनवणे आणि किशोर युवराज सोनवणे (सर्व रा. पारधी, ता. धरणगाव) यांनी धक्काबुक्की केली आणि अरेरावीची भाषा वापरून शासकीय कामात अडथळा निर्माण केला.
या घटनेसंदर्भात महिला पोलीस कॉन्स्टेबल योगिता पाचपांडे यांनी दिलेल्या फिर्यादीवरून बुधवारी १९ फेब्रुवारी रोजी सायंकाळी ६ वाजता धरणगाव पोलीस ठाण्यात पाच जणांविरोधात गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक मधुकर उंबरे करीत आहेत.
