जळगाव लाईव्ह ट्रेंड्स न्यूज प्रतिनिधी | शहरातील महाबळ परिसरातील त्र्यंबक नगरात एका वकिलाचे बंद घर फोडून घरातून सोन्याचांदीचे दागिने आणि ३० हजार रुपयांची रोकड असा एकूण ३ लाख ६३ हजार रुपये किमतीचा मुद्देमाल अज्ञात चोरट्यांनी चोरून नेल्याची घटना बुधवारी ३० ऑक्टोबर रोजी सकाळी ९ वाजता समोर आली आहे. याप्रकरणी सायंकाळी ५ वाजता रामानंदनगर पोलीस ठाण्यात गुन्हा दाखल करण्यात आला.
यासंदर्भात मिळालेली माहिती अशी की, दीपक सखाराम खादीलकर वय-५६, रा त्र्यंबक नगर, महाबळ परिसर, जळगाव हे आपल्या परिवारासह वास्तव्याला असून वकिली व्यवसाय करून ते आपला उदरनिर्वाह करत असतात. २२ ऑक्टोबर ते ३० ऑक्टोबर दरम्यान त्यांचे घर बंद असताना याचा फायदा घेत अज्ञात बंद कर फोडून घरातील कपाटातून सोन्या-चांदीचे दागिने आणि ३० हजार रुपयांची रोकड असा एकूण ३ लाख ६३ हजार रुपये किमतीचा मुद्देमाल चोरट्याने चोरून नेला. ही घटना गुरुवार ३० ऑक्टोबर रोजी सकाळी ९ वाजता उघडकीला आली आहे. या घटनेची माहिती मिळाल्यानंतर रामानंदनगर पोलिसांनी घटनास्थळी धाव घेऊन पंचनामा केला. याप्रकरणी दीपक खादीलकर यांनी दिलेल्या फिर्यादीवरून रामानंदनगर पोलीस ठाण्यात गुन्हा दाखल करण्यात आला आहे या घटनेचा पुढील तपास सहाय्यक पोलीस निरीक्षक विठ्ठल पाटील करीत आहे.
