जळगाव-लाईव्ह ट्रेंडस न्यूज प्रतिनिधी । जळगाव शहरातील गोकुळ स्विट मार्टजवळ घरकडे पायी जात असलेल्या महिलेच्या गळ्यातील ३५ हजार रूपये किंमतीचे सोन्याचे मंगळसुत्र अज्ञात चोरट्यांनी हिसकावून पसार झाल्याची घटना बुधवारी २३ ऑक्टोबर रोजी रात्री ८ वाजता घडली आहे. याप्रकरणी गुरूवारी २४ ऑक्टोबर रोजी मध्यरात्री १ वाजता जिल्हापेठ पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
याबाबत अधिक माहिती अशी की, जळगाव शहरातील भोईटे नगरात विजय किरण बोरसे वय ४९ या महिला आपल्या परिवारासह वास्तव्याला आहेत. बुधवारी २३ ऑक्टोबर रोजी रात्री ८ वाजता विजय बोरसे या महिला गोकुळ स्विटमार्ट जवळून पायी जात असतांना त्यावेळी एका अज्ञात चोरट्याने अंधाराचा फायदा घेत ३५ हजार रूपये किंमतीचे सोन्याचे मंगळसुत्र जबरी हिसकावून चोरून नेले. यावेळी त्यांनी आरडाओरड केली तोपर्यंत चोरटा पसार झाला होता. याबाबत महिलेने जिल्हा पेठ पोलीस ठाण्यात तक्रार दिली. त्यानुसार पोलीस ठाण्यात अज्ञात चोरट्यांविरोधात गुन्हा दाखल करण्यात आला. पुढील तपास सहाय्यक पोलीस निरीक्षक मिरा देशमुख हे करीत आहे.
