पाचोरा-लाईव्ह ट्रेंडस न्यूज प्रतिनिधी । फाल्गुन महिन्याचे औचित्य साधून शहरातील गांधी चौक येथील ऐतिहासिक चिमुकले शिव मंदिरात यंदा भक्ती, परंपरा आणि एकात्मतेचा अद्वितीय संगम पाहायला मिळाला. या महोत्सवाचे मुख्य आकर्षण म्हणजे भगवान शंकराच्या पिंडीवर साक्षात पांडुरंग विठ्ठलाचे साकारण्यात आलेले विलोभनीय रूप होते.
फाल्गुन महिन्याच्या औचित्य साधून गांधी चौक येथील चिमुकले शिव मंदिरात यंदा भक्ती, परंपरा आणि एकात्मतेचा अद्वितीय संगम पाहायला मिळाला. महोत्सवाच्या निमित्ताने शंकराच्या पिंडीवर साक्षात पांडुरंग विठ्ठल यांचे आकर्षक रूप साकारण्यात आले होते. पितांबर, तुळशीमाळ, मुकुट आणि फुलांच्या देखण्या सजावटीमुळे पिंडीवर विठ्ठलाचे साज चढवण्यात आले होते. या अनोख्या संकल्पनेमुळे भगवान शंकर आणि विठ्ठल भक्तीचा सुंदर संगम भाविकांना अनुभवता आला.
यावेळी परिसरातील सर्व महिलांनी एकत्र येत मंदिराभोवती दिव्यांची भव्य रोषणाई केली. तेलदिव्यांच्या प्रकाशात मंदिर परिसर उजळून निघाला आणि वातावरण अधिकच पवित्र व भक्तिमय झाले. महिलांच्या या सहभागामुळे महोत्सवाला विशेष आध्यात्मिक उंची प्राप्त झाली.
संध्याकाळी हरिनामाच्या गजरात भजन-कीर्तनाचा कार्यक्रम पार पडला. स्थानिक महिलांनी विठ्ठल आणि शंकर महिमेवर आधारित अभंग व भजन कीर्तन सादर करत उपस्थितांना मंत्रमुग्ध केले. त्यानंतर भगवान शंकराची महाआरती मोठ्या उत्साहात करण्यात आली. आरतीच्या वेळी संपूर्ण परिसर “हर हर महादेव” आणि “विठ्ठल विठ्ठल जय हरि विठ्ठल” या घोषणांनी दुमदुमून गेला. कार्यक्रमानंतर सर्व भाविकांना प्रसादाचे वाटप करण्यात आले. लहानांपासून ज्येष्ठांपर्यंत सर्वांनी भक्तिभावाने प्रसाद स्वीकारला. नागरिकांच्या सक्रिय सहभागामुळे हा फाल्गुन महोत्सव संस्मरणीय ठरला.
या उपक्रमामुळे शहरात धार्मिक सौहार्द, एकात्मता आणि सांस्कृतिक परंपरेचे जतन होत असल्याची भावना उपस्थितांनी व्यक्त केली. फाल्गुन महिन्यातील हा सोहळा भाविकांच्या हृदयात भक्तीचा दीप प्रज्वलित करून गेला. मंदिर सजविण्यासाठी तसेच कार्यक्रमाच्या यशस्वीतेसाठी परिसरातील महिला भगिनींनी परिश्रम घेतले
