रावेर-लाईव्ह ट्रेंड्स न्यूज प्रतिनिधी । रावेर तालुक्यात अवैध गौण खनिज वाहतुकीविरोधात तहसिलदार दिपा जेढे यांनी स्वतः रात्री फिल्डवर उतरून धडक कारवाई केल्याने अवैध वाळू वाहतूकदारांमध्ये खळबळ उडाली आहे. महसूल प्रशासनाच्या या कारवाईचे नागरिकांकडून स्वागत करण्यात येत असून अशा मोहिमा सातत्याने राबविण्याची मागणी होत आहे.
मिळालेल्या माहितीनुसार, ऐनपूर परिसरात अवैध वाळू वाहतूक सुरू असल्याची गोपनीय माहिती तहसिलदार दिपा जेढे यांना प्राप्त झाली होती. या माहितीच्या आधारे त्यांनी महसूल विभागाच्या पथकासह रात्री सापळा रचून कारवाई केली. या पथकात आकाश तायडे (तलाठी, मोरगाव), अश्विनी हांडे (तलाठी, बलवाडी), रवी शिंगणे (तलाठी, के-हाळा), अविनाश इंगोले, मनोहर भांडेकर (तलाठी, रसलपूर) तसेच भूषण कांबळे (महसूल सहाय्यक, गौण खनिज शाखा) यांचा समावेश होता.
तहसिलदार जेढे यांच्या नेतृत्वाखाली झालेल्या या कारवाईमुळे अवैध वाळू वाहतूक करणाऱ्यांचे धाबे दणाणले असून महसूल प्रशासनाच्या धडक भूमिकेची सर्वत्र चर्चा सुरू आहे. अवैध उत्खनन आणि वाहतुकीविरोधात प्रशासनाने सुरू केलेली “वॉश आऊट” मोहीम आणखी तीव्र करण्याची मागणी नागरिकांकडून होत आहे.
दरम्यान, निंभोरा सिम ते अजंदे मार्गावरील बरर्डी आणि खिरवड परिसरातून रात्रीच्या वेळी मोठ्या प्रमाणात अवैध वाळू वाहतूक होत असल्याची चर्चा आहे. या भागातील स्थानिक महसूल यंत्रणेने अधिक सतर्क राहून कठोर कारवाई करावी, अशी अपेक्षा नागरिकांनी व्यक्त केली आहे. संबंधित भागातही तत्काळ धडक मोहिम राबवून अवैध वाळू वाहतुकीला आळा घालावा, अशी मागणी जोर धरत आहे.
अवैध गौण खनिज उत्खनन व वाहतुकीमुळे शासनाच्या महसुलाचे मोठे नुकसान होत असून पर्यावरणालाही धोका निर्माण होत आहे. त्यामुळे अशा बेकायदेशीर प्रकारांविरोधात महसूल प्रशासनाने सुरू केलेल्या कारवायांना अधिक गती देण्याची गरज असल्याचे मत नागरिकांकडून व्यक्त होत आहे.
