जळगाव-लाईव्ह ट्रेंडस न्यूज प्रतिनिधी । सध्या सुरू असलेल्या दहावी आणि बारावीच्या बोर्ड परीक्षेच्या पार्श्वभूमीवर, विद्यार्थ्यांची एकाग्रता भंग होऊ नये यासाठी महापौर दिपमाला काळे यांनी ध्वनीक्षेपकांच्या (लाऊड स्पीकर) आवाजावर नियंत्रण ठेवण्याचे आवाहन प्रसिध्दीपत्रकातून कळविले आहे. वाढत्या गोंगाटामुळे विद्यार्थ्यांच्या शैक्षणिक प्रगतीवर विपरीत परिणाम होऊ शकतो, ही बाब लक्षात घेऊन महापौरांनी हे पाऊल उचलले आहे.
सध्या संपूर्ण महाराष्ट्रात उच्च माध्यमिक बारावी परीक्षा सुरू असून, २० फेब्रुवारीपासून माध्यमिक दहावीच्या परीक्षांनाही सुरुवात होत आहे. शहरातील बहुतांश विद्यालयांमध्ये या परीक्षांचे केंद्र असून परीक्षा कालावधीत परिसरात शांतता राखणे अत्यंत गरजेचे आहे. मात्र, याच काळात शहरातील जी.एस. ग्राऊंड आणि सागर पार्क या मैदानांवर विविध क्रिकेट प्रीमियर लीगचे सामने सुरू आहेत. या सामन्यांच्या वेळी समालोचनासाठी वापरल्या जाणाऱ्या लाऊड स्पीकरचा आवाज अत्यंत मोठा असतो, ज्याचा फटका जवळच असलेल्या शाळा, महाविद्यालये आणि रहिवाशांना बसत आहे. आयोजकांसाठी कडक नियमावली महापौर कार्यालयातून प्रसिद्ध करण्यात आलेल्या पत्रकानुसार, शहरातील विविध कार्यक्रमांच्या आणि क्रिकेट लीगच्या आयोजकांना स्पष्ट सूचना देण्यात आल्या आहेत.
महापौरांनी खालील मुद्द्यांवर दिला भर :
भविष्यात कोणत्याही मोठ्या कार्यक्रमांचे आयोजन शक्यतो परीक्षेच्या काळात करू नये. कार्यक्रमांदरम्यान ध्वनीक्षेपकांचा आवाज विहित मर्यादेतच ठेवावा. सायंकाळी ६ वाजेनंतर आवाजाची तीव्रता कमीत कमी असावी. रात्री १० वाजेनंतर लाऊड स्पीकर पूर्णपणे बंद ठेवावेत.
विद्यार्थ्यांचे शैक्षणिक हित जपण्याचे आवाहन :
“विद्यार्थ्यांचे भविष्य हेच शहराचे भविष्य आहे. मोठ्या आवाजामुळे त्यांच्या अभ्यासात व्यत्यय येऊन त्यांचे शैक्षणिक नुकसान होऊ शकते. त्यामुळे सर्व आयोजक आणि नागरिकांनी सहकार्य करावे,” असे आवाहन महापौर दिपमाला काळे यांनी केले आहे.
