जळगाव-लाईव्ह ट्रेंडस न्यूज प्रतिनिधी । जळगाव शहर आणि मालेगाव येथून मोटारसायकलींची चोरी करणाऱ्या तिन जणांना एमआयडीसी पोलीसांनी कारवाई करत अटक केली आहे. त्यांच्याकडून चोरीच्या चार मोटारसायकली जप्त केल्या आहे. विशेष म्हणजे, हे आरोपी मालेगाव येथील हाफ मर्डरप्रकरणात फरार असल्याचे समोर आले आहे. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.
जळगाव जिल्ह्यात मोटारसायकल चोरीच्या वाढत्या घटनांवर आळा घालण्यासाठी पोलीस अधीक्षक महेश्वर रेड्डी यांनी विशेष मोहिमेचे निर्देश दिले होते. त्याअनुषंगाने पोलीसांना कारवाईच्या सुचना दिल्या होत्या. १६ मार्च रोजी एमआयडीसी पोलिस ठाण्याच्या पथकाने हद्दीत गस्त घालत असताना मुबीन शाह शकील शाह (वय २०), दानिश शाह जहीर शाह (वय २०) दोन्ही रा. मालेगाव आणि अमीर उर्फ अमिन शाह जहुन शाह (वय २२) रा. शाहू नगर, जळगाव हे संशयास्पद हालचाली करताना आढळले.
पोलिसांनी त्यांना थांबण्याचा इशारा केला, मात्र त्यांनी पळून जाण्याचा प्रयत्न केला. पोलिसांनी त्यांना पाठलाग करून ताब्यात घेतले. पोलिसांनी संशयितांच्या ताब्यातून चार मोटारसायकली जप्त केल्या. या मोटारसायकली जळगाव शहर, एमआयडीसी आणि मालेगाव येथून चोरल्याचे समोर आले आहे. पोलिसांनी त्यांची चौकशी केली असता, त्यांनी गुन्ह्यांची कबुली दिली. संशयित आरोपी मुबीन शाह, दानिश शाह आणि अमीर उर्फ अमिन शाह यांच्यावर मालेगाव येथील आझाद नगर पोलीस ठाण्यात खुनाच्या प्रयत्नाचा गुन्हा दाखल आहे. ते या गुन्ह्यात फरार होते.
जळगाव पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते आणि उपविभागीय अधिकारी संदीप गावीत यांच्या मार्गदर्शनाखाली एमआयडीसी पोलीस ठाण्याचे पोलीस निरीक्षक संदीप पाटील यांच्या सुचनेनुसार पोलीस उपनिरीक्षक राहुल तायडे, चंद्रकांत घनके, रवींद्र चौधरी, पोलीस नाईक प्रदीप चौधरी, पोलीस कॉन्स्टेबल रतन गिते, सिद्धेश डापकर आणि जॅकेश हटकर यांनी ही कारवाई केली आहे. पुढील तपास पोलिस उपनिरीक्षक चंद्रकांत घनके, पोलीस नाईक प्रदीप चौधरी आणि पोलीस कॉन्स्टेबल रतन गिते हे करत आहेत.
