जळगाव लाईव्ह ट्रेंड्स न्यूज प्रतिनिधी | पाळधी ते तरसोद या राष्ट्रीय महामार्गावरील बायपास चौपदरीकरण रस्त्यावर शुक्रवार, २१ नोव्हेंबर रोजी दुपारी २ वाजण्याच्या सुमारास ट्रकवरील नियंत्रण सुटल्याने एक मालवाहू ट्रक कलंडला. शहरातील कचरा डेपोजवळ हा अपघात झाला असून, यामध्ये चालकासह क्लिनर किरकोळ जखमी झाले आहेत. या अपघातामुळे काही काळ राष्ट्रीय महामार्गावरील वाहतूक पूर्णपणे खोळंबली होती.
याबाबत अधिक माहिती अशी की, ट्रक क्रमांक (एमपी १२ एच ०६६२) हा मध्यप्रदेशातून ठिबक सिंचनाच्या नळ्यांचे बंडल भरून धुळ्याकडे जात होता. जळगाव शहरापासून जवळ असलेल्या पाळधी ते तरसोद बायपासच्या चौपदरीकरण रस्त्यावर कचरा डेपोजवळ आला असता, चालकाचे वाहनावरील नियंत्रण सुटले आणि ट्रक रस्त्याच्या कडेला कलंडला.
सुदैवाने अपघाताची तीव्रता जास्त नसल्याने ट्रक चालक आणि क्लिनर किरकोळ जखमी झाले. त्यांना तातडीने वैद्यकीय मदत पुरवण्यात आली.
ट्रक रस्त्याच्या मध्यभागी कलंडल्यामुळे दोन्ही बाजूची वाहतूक काही काळासाठी थांबली आणि वाहनांच्या लांबच लांब रांगा लागल्या होत्या. अपघाताची माहिती मिळताच जळगाव तालुका पोलिसांनी तत्काळ घटनास्थळी धाव घेतली. शेवटचे वृत्त हाती आले तेव्हा, पोलीस परिस्थिती हाताळत होते आणि महामार्ग मोकळा करण्याचे तसेच अपघातग्रस्त ट्रक बाजूला करण्याचे काम युद्धपातळीवर सुरू होते.
