जळगाव-लाईव्ह ट्रेंडस न्यूज प्रतिनिधी । जळगाव शहरातील राजकमल चौकात भरधाव कारने प्रवाशी रिक्षाला समोरून जोरदार धडक दिल्याने दोन चुलत भाऊ गंभीर जखमी झाले होते. ही घटना ३ फेब्रुवारी रोजी घडली होती. याप्रकरणी गुरुवारी, २० फेब्रुवारी रोजी रात्री १० वाजता शनीपेठ पोलीस ठाण्यात कारचालकाविरोधात गुन्हा दाखल करण्यात आला आहे.
शेख अन्सार शेख सईद (वय ४१, रा. मुजावर नगर, जामनेर) हे हमाल काम करून आपला उदरनिर्वाह करतात. जळगाव रेल्वे स्टेशन येथून ते अजिंठा चौकात जाण्यासाठी रिक्षाने प्रवास करत होते. राजकमल चौकातून जात असताना समोरून येणाऱ्या कारने त्यांच्या रिक्षाला जोरदार धडक दिली. या धडकेत शेख अन्सारी आणि त्यांचे चुलत भाऊ गंभीर जखमी झाले. त्यांच्यावर खासगी रुग्णालयात उपचार करण्यात आले.
उपचार घेतल्यानंतर शेख अन्सार यांनी गुरुवारी रात्री १० वाजता याबाबत शनीपेठ पोलीस ठाण्यात कारवरील चालक गणेश नाना पाटील (रा. भडगाव) यांच्या विरोधात गुन्हा दाखल करण्यात आला आहे. पुढील तपास पोहेकॉ उमेश ठाकूर हे करीत आहेत.
