जळगाव – लाईव्ह ट्रेंड्स न्यूज प्रतिनिधी । जळगाव जिल्हा वकील संघातर्फे नुकतेच एक विशेष व्याख्यान आयोजित करण्यात आले होते. ‘शवविच्छेदन (Postmortem) आणि त्याचे कायदेशीर पैलू’ या विषयावर ज्येष्ठ फौजदारी वकील ॲड. सुशील ए. अत्रे यांनी उपस्थितांना सखोल मार्गदर्शन केले. गुन्ह्यांच्या तपासात वैद्यकीय पुराव्यांचे महत्त्व आणि कायद्याची सांगड कशी घालावी, यावर त्यांनी प्रकाश टाकल्याने हे सत्र नवीन वकिलांसाठी अत्यंत अभ्यासपूर्ण ठरले.
जळगाव जिल्हा न्यायालयातील बार रूम क्रमांक ११६ मध्ये मंगळवार, २८ एप्रिल रोजी हा कार्यक्रम पार पडला. ॲड. सुशील अत्रे यांनी आपल्या प्रदीर्घ अनुभवातून उपस्थितांना मार्गदर्शन करताना शवविच्छेदन अहवालाचे गुन्ह्यांच्या तपासातील महत्त्व विशद केले. त्यांनी विशेषतः कनिष्ठ वकिलांना मार्गदर्शन करताना सांगितले की, गुन्ह्यांच्या तपासात वैद्यकीय पुराव्यांची आणि कायद्याच्या विविध कलमांची सांगड घालणे अत्यंत आवश्यक असते. उलटतपासणी दरम्यान शवविच्छेदन अहवालातील तांत्रिक बाबींचा प्रभावीपणे वापर कसा करावा, याचे बारकावे त्यांनी उपस्थितांना समजावून सांगितले. वैद्यकीय न्यायशास्त्राचा (Medical Jurisprudence) सराव करताना अभ्यास असणे किती गरजेचे आहे, हे त्यांनी विविध प्रकरणांच्या दाखल्यांसह स्पष्ट केले.
या कार्यक्रमाचे आयोजन जळगाव जिल्हा वकील संघाचे अध्यक्ष ॲड. सागर चित्रे आणि सचिव ॲड. वीरेंद्र पाटील यांच्या पुढाकाराने करण्यात आले होते. याप्रसंगी वकील संघाचे सदस्य ॲड. आशिष पाटील, सुनीलकुमार चोरडिया, ॲड. संजय सपकाळे यांच्यासह मोठ्या संख्येने वकील बांधव उपस्थित होते. विशेषतः कनिष्ठ वकिलांनी या सत्रात मोठ्या संख्येने हजेरी लावून कायदेशीर ज्ञानाची शिदोरी गोळा केली. या उपक्रमाचे सर्वस्तरातून कौतुक होत असून, वकिली व्यवसायातील व्यावसायिक कौशल्य आणि ज्ञानवृद्धीसाठी अशा प्रकारची व्याख्याने अत्यंत मार्गदर्शक ठरत असल्याचे मत उपस्थितांनी व्यक्त केले.
