भडगाव-लाईव्ह ट्रेंडस न्यूज प्रतिनिधी । भडगाव पोलिस ठाण्याचे प्रभारी पोलिस निरीक्षक पांडुरंग पवार यांनी आपल्या पदाचा दुरुपयोग करून आर्थिक फायद्यासाठी बेकायदेशीर निर्णय घेतल्याचा आरोप होत आहे. याबाबत भाजपा तालुकाध्यक्ष सोमनाथ पाटील यांनी पोलिस अधीक्षक महेश्वर रेड्डी यांच्याकडे लेखी तक्रार दाखल केली आहे.
गोवंश ताब्यात घेण्याच्या कारवाईवर संशय
४ व ५ मार्च २०२५ रोजी भडगाव पोलिस ठाण्यात गुन्हा क्रमांक ७५/२०२५ व ७६/२०२५ दाखल झाले होते. या गुन्ह्यांत बेकायदेशीर गोवंश वाहतूक करणारी वाहने आणि ११ गोवंश पोलिसांनी जप्त केले होते. यानंतर, हे सर्व गोवंश निलमणी प्रतिष्ठान संचलित गोसंवर्धन केंद्रात सुपूर्द करण्यात आले. मात्र, पोलिस निरीक्षक पांडुरंग पवार यांनी स्वतःच्या आर्थिक फायद्यासाठी, न्यायालयाच्या अधिकारात हस्तक्षेप करून, संबंधित गोवंश सोडण्याचा आदेश दिला, असा गंभीर आरोप तक्रारीत करण्यात आला आहे. तसेच, गोवंश सोडण्याचा कोणताही शासकीय आदेश नसतानाही, पोलिस निरीक्षकांनी दबाव टाकून गोवंश माफियांना पाठिंबा दिला, असा आरोप तक्रारीत आहे.
मुख्यमंत्र्यांच्या प्रतिमेला धक्का?
तक्रारीनुसार, पोलिस निरीक्षक पवार यांनी मुख्यमंत्री यांच्या १०० दिवसीय ७ कलमी कार्यक्रमाचा गैरवापर करून, चुकीची माहिती प्रसारित केली. सोशल मीडियावरील एका मुलाखतीत, भारतीय नागरी सुरक्षा संहिता २०२३ च्या कलम १०७(३) आणि १०६(३) च्या आधारे गोवंश सोडल्याचा दावा करण्यात आला. मात्र, ही दोन्ही कलमे या प्रकरणाला लागू होत नाहीत, असे तक्रारीत स्पष्ट करण्यात आले आहे.
मद्यधुंद चालक आणि गोवंशाच्या जखमी अवस्थेकडे दुर्लक्ष?
तक्रारीनुसार, गुन्हा क्रमांक ७६/२०२५ मधील वाहनाचा चालक हा मद्यधुंद अवस्थेत असताना त्याच्या विरोधात कोणतीही कारवाई करण्यात आलेली नाही. तसेच, जप्त केलेले गोवंश जखमी अवस्थेत असतानाही त्यांचे वैद्यकीय प्रमाणपत्र घेतले गेले नाही, हे देखील या प्रकरणातील महत्त्वाचे मुद्दे आहेत.
पोलिस निरीक्षकांवर गुन्हा दाखल करण्याची मागणी
तक्रारीत, पोलिस निरीक्षक पांडुरंग पवार यांच्यासह त्यांच्या सहकाऱ्यांचाही गोवंश तस्करीत प्रत्यक्ष-अप्रत्यक्ष सहभाग असल्याचा उल्लेख आहे. त्यामुळे, पोलिस निरीक्षकांना या गुन्ह्यात सहआरोपी म्हणून समाविष्ट करावे आणि त्यांना सेवेतून बडतर्फ करावे, अशी मागणी करण्यात आली आहे. याप्रकरणी पोलिस अधीक्षक महेश्वर रेड्डी यांनी अद्याप कोणतेही अधिकृत विधान दिले नाही. मात्र, संपूर्ण घटनेची सखोल चौकशी करून दोषींवर कठोर कारवाई करावी, अशी स्थानिकांची मागणी आहे.
