मुंबई, वृत्तसंस्था | अभिनेता संजय दत्त येत्या २५ सप्टेंबर रोजी राष्ट्रीय समाज पक्षात (रासप) प्रवेश करणार असल्याचा दावा रासपचे राष्ट्रीय अध्यक्ष महादेव जानकर यांनी केला आहे. संजय दत्त यांचा आजच पक्षात प्रवेश होणार होता, मात्र काही कारणास्तव ते येऊ शकले नसल्याचे जानकर यांनी सांगितले. त्यामुळे संजूबाबा रासपमध्ये जाणार का ? या चर्चेने जोर धरला आहे.
दादरच्या शिवाजी पार्क मैदानावर राष्ट्रीय समाज पक्षाचा वर्धापन दिन साजरा करण्यात आला. यावेळी जानकर यांनी प्रचंड शक्तिप्रदर्शन केले. याप्रसंगी महिला व बालकल्याण मंत्री पंकजा मुंडे ही उपस्थित होत्या. या मेळाव्याला संबोधित करताना जानकर यांनी संजय दत्त रासपमध्ये प्रवेश करणार असल्याचे जाहीर केले.
विधानसभेसाठी १४ जागा हव्यात :- लोकसभा निवडणुकीत आम्हाला एकही जागा मिळाली नाही. तरीही आम्ही युतीसोबत राहिलो. मात्र आता विधानसभेसाठी आम्हाला १४ जागा हव्या आहेत. या १४ जागा मिळाल्या तरच आमच्या पक्षाला मान्यता मिळेल. कर्नाटक, उत्तर प्रदेश आणि गुजरातमध्ये रासपला राजकीय पक्ष म्हणून मान्यता असल्याचे सांगतानाच रासपला दौंडची जागा सोडण्यात आल्याचेही त्यांनी सांगितले. रासप भाजपच्या चिन्हावर निवडणूक लढणार नाही, आम्ही आमच्याच चिन्हावर निवडणूक लढवू, असे सांगतानाच पंकजा मुंडे यांनी आमची मागणी पूर्ण करावी, असा आग्रहही त्यांनी धरला. दरम्यान, धनगर समाजाला आरक्षण देण्याचा निर्णय भाजप सरकारच घेईल. त्यामुळे आम्ही भाजपला साथ देत असल्याचे त्यांनी जाहीर केले.
संजय दत्तच्या शुभेच्छा :- अभिनेता संजय दत्त यांनी रासपच्या वर्धापन दिनानिमित्त शुभेच्छा दिल्या आहेत. संजय दत्तने एका व्हिडिओद्वारे या शुभेच्छा दिल्या आहेत. जानकर हे माझ्या भावासारखे असून त्यांना मी शुभेच्छा देतो. मी इथे असतो तर नक्कीच त्यांच्या मेळाव्याला आलो असतो, असंसे संजय दत्तने म्हटले आहे. जानकर यांनी संजय दत्तबाबत केलेला दावा आणि त्याच्या शुभेच्छांच्या व्हिडिओमुळे संजय दत्त रासपमध्ये जाणार का ? याकडे त्याच्या चाहत्यांचे लक्ष लागले आहे.
