वरणगाव-लाईव्ह ट्रेंडस न्यूज प्रतिनिधी | सिविल सोसायटीच्या वतीने आयोजित “रन फॉर वरणगाव” या स्पर्धेत भुसावळ स्पोर्ट्स अँड रनर्स असोसिएशनच्या धावपटूंनी मोठ्या संख्येने सहभाग नोंदवून वरणगावकरांना आरोग्यदायी जीवनशैलीचा संदेश दिला. स्पर्धेत असोसिएशनच्या ५७ धावपटूंनी भाग घेतला, ज्यामध्ये महिलांच्या गटात उल्लेखनीय यश मिळवले.
५ किमीच्या महिला गटात गुंजन गुप्ता यांनी अप्रतिम कामगिरी करत प्रथम स्थान पटकावले. १० किमीच्या महिला गटात सीमा पाटील यांनी पहिल्या क्रमांकावर विजय मिळवला, तर रीना परदेशी यांनी द्वितीय क्रमांक पटकावून संघाचे नाव उज्ज्वल केले. विजयी धावपटूंच्या घोषणेनंतर भुसावळ स्पोर्ट्स अँड रनर्स असोसिएशनच्या सदस्यांनी मोठ्या जल्लोषात त्यांचे अभिनंदन केले. स्पर्धेच्या बक्षीस वितरण सोहळ्याला प्रमुख पाहुणे म्हणून प्रा. प्रविण फालक, स्पर्धेचे सदिच्छादूत विजय फिरके आणि प्रविण पाटील उपस्थित होते. त्यांनी विजेत्या धावपटूंचे अभिनंदन करत, त्यांच्या कठोर परिश्रमांना सलाम केला.
स्पर्धेच्या यशस्वी आयोजनासाठी डॉ. राहुल भोईटे आणि वरणगाव सिविल सोसायटीच्या सदस्यांनी भुसावळ स्पोर्ट्स अँड रनर्स असोसिएशनच्या सहभागाचे आणि योगदानाचे कौतुक केले. धावपटूंनी वरणगावच्या नागरिकांना आरोग्य, फिटनेस आणि क्रीडा महत्त्वाचे असल्याचा संदेश दिला. या प्रसंगी डॉ. तुषार पाटील, गणसिंग पाटील, डॉ. नीलिमा नेहेते आणि डॉ. चारुलता पाटील यांचीही प्रमुख उपस्थिती होती. त्यांनी स्पर्धेत सहभागी झालेल्या प्रत्येक धावपटूचे कौतुक करत, अशा उपक्रमांच्या माध्यमातून तरुण पिढीमध्ये क्रीडाविषयक जागरूकता वाढवण्याचे महत्त्व अधोरेखित केले.
स्पर्धेच्या निमित्ताने वरणगाव शहरातील नागरिकांमध्ये उत्साहाचे वातावरण पाहायला मिळाले. नागरिकांनी धावपटूंचे जोरदार स्वागत करत त्यांच्या प्रोत्साहनाला हातभार लावला.”रन फॉर वरणगाव” या स्पर्धेने वरणगाव आणि भुसावळमधील क्रीडाप्रेमींना एकत्र आणत फिटनेस आणि आरोग्याचे महत्त्व अधोरेखित केले. भुसावळ स्पोर्ट्स अँड रनर्स असोसिएशनच्या धावपटूंनी दाखवलेल्या समर्पणाने आणि यशस्वी कामगिरीने हा उपक्रम अधिक स्मरणीय ठरला आहे.
