अमळनेर-लाईव्ह ट्रेंड्स न्यूज प्रतिनिधी । अमळनेर येथील प्रसिद्ध श्री मंगळग्रह मंदिरात नवरात्रोत्सवानिमित्त रविवार, ११ ऑक्टोबर रोजी शुभ मुहूर्तावर विधिवत पूजाअर्चा करून घटस्थापना करण्यात आली. त्रिशुलात्मक भगवान श्री कालभैरव आणि माता श्री भैरवी यांच्या मंदिरासमोर धार्मिक विधी पार पडले. यावेळी अतिजागृत भूमिमातेच्या मूर्तीवर सहस्र पुष्पार्चन करण्यात आले. मंदिरात करण्यात आलेली आकर्षक फुलांची सजावट आणि धार्मिक विधींमुळे परिसरात भक्तिमय वातावरण निर्माण झाले आहे. नवरात्रोत्सवानिमित्त १२ ते १८ ऑक्टोबरदरम्यान श्रीयंत्र व भौमयंत्रावर दररोज विशेष अर्चन, तसेच १९ ऑक्टोबर रोजी नवचंडी यज्ञाचे आयोजन करण्यात आले आहे.
आश्विन शुद्ध प्रतिपदा अर्थात मंगळ होरा या शुभ मुहूर्तावर घटस्थापनेचा धार्मिक कार्यक्रम पार पडला. घटस्थापनेचे यजमान शुभम वैष्णव गुरुजी सपत्नीक उपस्थित होते. मंदिराचे पुरोहित प्रसाद भंडारी, यश जोशी आणि तुषार दीक्षित यांनी धार्मिक विधींचे पौरोहित्य केले. या वेळी चंद्रकांत जोशी यांनी ढोलकीची साथ दिली, तर उमेश पाठक यांनी कार्यक्रमासाठी सहकार्य केले.
भूमिमातेच्या मूर्तीवर पुरोहित जयेंद्र वैद्य यांच्या हस्ते सहस्र पुष्पार्चन करण्यात आले. नवरात्रोत्सवाच्या पार्श्वभूमीवर मंदिर परिसरात विविध प्रकारच्या फुलांची आकर्षक सजावट करण्यात आली आहे. विधिवत पूजा, मंत्रोच्चार आणि धार्मिक विधींमुळे मंदिरात भाविकांसाठी भक्तिमय वातावरण अनुभवायला मिळत आहे. सोमवार, १२ ऑक्टोबर ते रविवार, १८ ऑक्टोबर या कालावधीत मंदिरात दररोज सकाळी १० ते दुपारी १२.३० या वेळेत विशेष यजमानांच्या हस्ते श्रीयंत्र आणि भौमयंत्रावर अर्चन करण्यात येणार आहे. नवरात्रोत्सवातील या दैनंदिन धार्मिक कार्यक्रमांमध्ये भाविकांना सहभागी होता येणार आहे. तसेच दररोज सायंकाळी ६.३० वाजता शहरातील विविध महिला मंडळांच्या वतीने सामूहिक आरती करण्यात येणार आहे.
नवरात्रोत्सवातील प्रमुख धार्मिक कार्यक्रमांपैकी एक असलेल्या नवचंडी यज्ञाचे आयोजन सोमवार, १९ ऑक्टोबर रोजी करण्यात आले आहे. हा यज्ञ दोन सत्रांत पार पडणार आहे. पहिल्या सत्राची वेळ सकाळी ९ ते दुपारी १२ अशी असून, दुसरे सत्र दुपारी २ ते सायंकाळी ५ या वेळेत होईल. सायंकाळी यज्ञाची पूर्णाहुती करण्यात येणार आहे. श्री मंगळग्रह मंदिरातील नवरात्रोत्सवाच्या निमित्ताने आयोजित करण्यात आलेल्या या धार्मिक कार्यक्रमांना भाविकांनी मोठ्या संख्येने उपस्थित राहून दर्शनाचा आणि पूजाअर्चेचा लाभ घ्यावा, असे आवाहन मंगळग्रह सेवा संस्थेतर्फे करण्यात आले आहे.
