नवी दिल्ली : वृत्तसंस्था । #ResignModi हॅशटॅग चुकून ब्लॉक झाला , तशी आम्हाला केंद्र सरकारकडून सूचना नव्हती असा खुलासा करीत हा हॅशटॅग ब्लॉक केला म्हणून टीका होण्यास सुरूवात होताच फेसबुकने चूक मान्य केली आणि हा हॅशटॅग पुन्हा रिस्टोर केला आहे.
देशभरात कोरोना संकट वाढताना ऑक्सिजनपासून हॉस्पिटल बेडपर्यंत अत्यावश्यक गोष्टींची उणीव आहे. सोशल मीडियावर काही नेटकरी सरकार आणि मोदी यांच्यावर टीकेचा भडीमार करत आहेत. विविध हॅशटॅग वापरुन मोदी सरकारवर टीका होत आहे. फेसबुकवरही पंतप्रधान मोदींच्या राजीनाम्याची मागणी करणारा हॅशटॅग – #ResignModi ट्रेंड होत होता, मात्र नंतर फेसबुकने हा हॅशटॅगच ब्लॉक केला होता .
बुधवारी फेसबुकवर नेटकऱ्यांकडून #ResignModi हा हॅशटॅग ट्रेंड केला जात होता नंतर फेसबुकने हा हॅशटॅग ब्लॉक केल्यामुळे गदारोळ झाला. हा हॅशटॅग ब्लॉक झाल्यानंतर काहींनी हॅशटॅग #ResignModi सर्च करण्यास सुरूवात केली असता त्यांना ‘या पोस्ट्स आमच्या कम्युनिटी स्टँडर्ड्सचं उल्लंघन होत असल्याने ब्लॉक करण्यात आल्या आहेत’ अशाप्रकारचा संदेश दिसला. नतर अनेकांनी हॅशटॅग ब्लॉक केल्यावरुन ट्विटरवर तक्रार करण्यास सुरूवात केली. काहींनी हा लोकशाहीला धोका असल्याचंही म्हटलं. काही तासांनी फेसबुकने चूक मान्य करत हॅशटॅग पूर्ववत केला.
“आमच्याकडून चुकून तो हॅशटॅग ब्लॉक झाला होता, आम्हाला त्यासाठी भारत सरकारकडून कोणतीही सूचना मिळाली नव्हती. आता हॅशटॅग पूर्ववत झाला आहे”, असं स्पष्टीकरण फेसबुककडून देण्यात आलं फेसबुककडून वेगवेगळ्या कारणांमुळे हॅशटॅग ब्लॉक केले जातात. काहीवेळेस स्वहस्ते (मॅन्युअली) परंतु बऱ्याचदा स्वयंचलितरित्या (ऑटोमॅटिक) अंतर्गत मार्गदर्शक तत्त्वांवर आधारित हॅशटॅग ब्लॉक होतात, लेबलशी संबंधित एरर आल्यामुळे तो हॅशटॅग ब्लॉक झाला होता, असं कंपनीच्या प्रवक्त्यांकडून सांगण्यात आलं आहे. मंगळवारीही ट्विटरवर पंतप्रधान नरेंद्र मोदी यांच्याबाबत नकारात्मक ट्रेंड सुरू होते. जवळपास पाच तास हॅशटॅग ‘फेल्डमोदी’ ट्विटरवर टॉप ट्रेंड होता.
