सावदा ता.रावेर-लाईव्ह ट्रेंडस न्यूज प्रतिनिधी | सिंगनुर येथील प्रा. संजय मोरे यांना हरियाणा राज्यातील कर्नाल येथे राष्ट्रीय ग्लोबल आयकॉन पुरस्काराने सन्मानित करण्यात आले आहे. सामाजिक क्षेत्रात उल्लेखनीय कार्य केल्याबद्दल अँटी करप्शन फाउंडेशन ऑफ इंडिया यांच्या वतीने संपूर्ण भारतातील ३० व्यक्तींना या प्रतिष्ठित पुरस्काराने गौरविण्यात आले. महाराष्ट्र राज्यातून प्रथम एकमेव सन्मानित व्यक्ती म्हणून प्रा. मोरे यांची निवड झाली आहे.
या कार्यक्रमाचे अध्यक्ष राष्ट्रीय अध्यक्ष रणज्योत सिंह होते, तर प्रमुख अतिथी म्हणून अँटी करप्शन मानव अधिकार सुप्रीमो नरेंद्र अरोरा उपस्थित होते. तसेच, सिनेसृष्टीतील प्रसिद्ध कलाकार अभिनेता दिलीप ताहिल, अभिनेत्री सुधा चंदन, आणि ‘आशिकी’ फेम अभिनेता राहुल रॉय हे सेलिब्रिटी प्रमुख पाहुणे म्हणून हजर होते. या प्रसंगी प्रा. संजय मोरे आणि मायाताई मोरे यांचा शाल, पुष्पगुच्छ आणि ट्रॉफी देऊन सन्मान करण्यात आला.
कार्यक्रमाला राष्ट्रीय चेअरमन प्रवीण कुमार बन्सल, आंतरराष्ट्रीय अध्यक्ष डॉ. निशा गुप्ता, राष्ट्रीय संचालक राम नारायण साहू, तसेच महाराष्ट्रातील विविध मान्यवर उपस्थित होते. यात अँटी करप्शन महाराष्ट्र उपाध्यक्ष प्रशांत जाधव, डॉ. प्रतीक्षा जाधव, जिल्हा उपाध्यक्ष संजय कोळी, आणि मुंबई दैनिक युवक आधारचे उपसंपादक किशोर गुडेकर यांचा समावेश होता.
प्रा. संजय मोरे यांना मिळालेल्या या सन्मानाबद्दल विविध राजकीय व सामाजिक क्षेत्रातील दिग्गजांनी त्यांचे अभिनंदन केले आहे. जलसंपदा मंत्री गिरीश महाजन, सेवानिवृत्त न्यायाधीश बी. ए. कोळी, माजी मंत्री डॉ. दशरथ भांडे, अनुसूचित जाती आयोगाचे अध्यक्ष किशोर मकवाना, आणि इतर अनेक प्रतिष्ठित व्यक्तींनी त्यांच्याविषयी गौरवोद्गार काढले.
प्रा. मोरे यांनी यापूर्वीही अनेक राष्ट्रीय पुरस्कार मिळवले असून, हा पुरस्कार त्यांच्या सामाजिक आणि राजकीय कार्यात एक मानाचा तुरा ठरला आहे. त्यांच्या या यशाबद्दल संपूर्ण मित्रपरिवार आणि शुभेच्छुकांनी त्यांना अभिनंदन दिले आहे.
