रावेर लाईव्ह ट्रेंडस न्यूज प्रतिनिधी । मध्य प्रदेशातून रावेरमार्गे फैजपूर येथे जाणारा गुटख्याचा साठा फैजपूर उपविभागीय पोलिस अधिकारी अन्नपूर्णा सिंग यांच्या पथकाने जप्त केला. या कारवाईत महाराष्ट्रात बंदी असलेला तब्बल ४ लाख १७ हजार रुपयांचा गुटखा हस्तगत करण्यात आला असून, एक आरोपी अटकेत आहे, तर एक फरार आहे.
गुप्त माहितीवरून सापळा
फैजपूर विभागाच्या पोलिसांना मध्यप्रदेशातील बुऱ्हाणपूर येथून रावेरमार्गे गुटख्याची तस्करी होणार असल्याची गुप्त माहिती मिळाली. त्यानंतर पोलीस कॉन्स्टेबल महेंद्र महाजन, पोलीस नाईक अक्षय पवार आणि आबीद शेख यांनी शुक्रवारी पहाटे तीन वाजल्यापासून बुऱ्हाणपूर-अंकलेश्वर महामार्गावर तपासणी मोहीम हाती घेतली. मारुती मंदिराजवळ वाहन तपासणीदरम्यान बुऱ्हाणपूरहून आलेली ॲपे पँजो (एमएच 03 एएच 7322) पोलिसांनी थांबवली. वाहनाची झडती घेतली असता ४ लाख १७ हजार १२० रुपयांचा बंदी घातलेला गुटखा आढळून आला.
एक आरोपी अटकेत, मुख्य पुरवठादार पसार
गुटखा वाहतूक करणाऱ्या वाहनाच्या चालकाला ताब्यात घेण्यात आले असून, त्याची ओळख शेख वाजीद शेख आबीद (वय ३४, रा. धोबीवाडा, फैजपूर) अशी आहे. प्राथमिक चौकशीत शेख जुबेर शेख इकबाल (रा. हाजिरा मोहल्ला, फैजपूर) याच्या सांगण्यावरून हा गुटखा फैजपूरमध्ये विक्रीसाठी नेत असल्याचे समोर आले आहे. या कारवाईदरम्यान पोलिसांनी एकूण ४ लाख ८१ हजार १२० रुपयांचा मुद्देमाल जप्त केला आहे, त्यामध्ये २ लाख ७२ हजार २७२ रुपयांचा १,४५६ पान मसाल्याचे पाउच (विमल ब्रँड), ९ हजार ६८० रुपयांचा वी-१ तंबाखू (४४० लहान पाउच), ६० हजार रुपये किमतीचे पँजो ॲपे वाहन, ४ हजार रुपयांचा मोबाईल जप्त करण्यात आला आहे. याप्रकरणी पोलीस नाईक अक्षय पवार यांच्या फिर्यादीवरून दोघांविरोधात गुन्हा दाखल करण्यात आला आहे. पुढील तपास सहायक पोलीस निरीक्षक अंकुश जाधव करत आहेत.
