फरीदाबाद – लाईव्ह ट्रेंड्स न्यूज वृत्तसेवा। हरियाणातील गुरुग्राममध्ये युट्यूबर आणि बिग बॉस ओटीटी विजेता एल्विश यादवच्या घरावर झालेल्या गोळीबार प्रकरणात मुख्य आरोपीला फरीदाबाद पोलिसांनी चकमकीनंतर अटक केली आहे. पोलिसांनी केलेल्या अचूक आणि धाडसी कारवाईत आरोपी इशांत उर्फ इशू गांधी जखमी झाला असून त्याला रुग्णालयात दाखल करण्यात आले आहे.
फरीदाबाद गुन्हे शाखा सेक्टर-३० च्या पथकाला मिळालेल्या गुप्त माहितीच्या आधारे त्यांनी तातडीने कारवाई करत इशांतचा शोध घेतला. पोलिस घटनास्थळी पोहोचताच, इशांतने पोलिसांवर ऑटोमेटिक पिस्तूलने अंदाधुंद गोळीबार केला. जवळपास अर्धा डझनहून अधिक गोळ्या त्याने झाडल्या. या गोळीबाराला उत्तर देताना पोलिसांनीही प्रत्युत्तरात गोळी झाडली, ज्यात इशांतच्या पायाला गोळी लागली.
जखमी अवस्थेत इशांतला अटक करण्यात आली असून पुढील उपचारासाठी त्याला फरीदाबादच्या बीके रुग्णालयात दाखल करण्यात आले आहे. पोलिसांनी दिलेल्या माहितीनुसार, इशांत याच आरोपीने आपल्या एका साथीदारासह गुरुग्राममधील एल्विश यादवच्या घरावर गोळीबार केला होता. हा प्रकार घडल्यापासूनच पोलिस त्याचा शोध घेत होते.
या घटनेने संपूर्ण हरियाणा आणि दिल्ली-एनसीआर परिसरात खळबळ उडवली होती. सोशल मीडियावर मोठ्या प्रमाणावर चर्चेचा विषय बनलेला हा प्रकरण पोलिसांसाठी प्रतिष्ठेचा मुद्दा बनला होता. अटीतटीच्या चकमकीनंतर आरोपी जेरबंद झाल्यामुळे आता या प्रकरणातील आणखी आरोपींना पकडण्याचा मार्ग मोकळा झाला आहे.
ही चकमक म्हणजे पोलिसांच्या कार्यक्षमतेचं उदाहरण असून, गुन्हेगारी प्रवृत्तींना दिलेला स्पष्ट इशारा आहे. एल्विश यादवच्या सुरक्षेबाबत चिंता व्यक्त केली जात होती, परंतु आता मुख्य आरोपी पोलिसांच्या ताब्यात आल्यामुळे काही प्रमाणात समाधान व्यक्त होत आहे.
