मुंबई-वृत्तसेवा । डिजिटल पेमेंट क्षेत्रात आघाडीवर असलेल्या फोन पेने आपल्या कोट्यवधी वापरकर्त्यांसाठी एक महत्त्वाचे आणि अत्याधुनिक फीचर सुरू केले आहे. आता यूपीआय व्यवहार करताना वारंवार 4 किंवा 6 अंकी पिन टाकण्याची गरज भासणार नाही. वापरकर्ते त्यांच्या स्मार्टफोनमधील फिंगरप्रिंट किंवा फेस आयडीसारख्या बायोमेट्रिक प्रमाणीकरणाचा वापर करून थेट आणि सुरक्षित पद्धतीने पेमेंट करू शकणार आहेत.
डिजिटल व्यवहार अधिक सुरक्षित आणि सोपे करण्याच्या उद्देशाने हे फीचर सुरू करण्यात आल्याचे कंपनीने स्पष्ट केले आहे. सध्या ही सुविधा अँड्रॉइड वापरकर्त्यांसाठी उपलब्ध करून देण्यात आली असून, लवकरच आयफोन वापरकर्त्यांनाही याचा लाभ मिळणार आहे. यामुळे डिजिटल पेमेंटचा अनुभव अधिक जलद आणि सुलभ होणार आहे.
कंपनीच्या माहितीनुसार, अनेकदा सार्वजनिक किंवा गर्दीच्या ठिकाणी पेमेंट करताना ‘शोल्डर सर्फिंग’चा धोका निर्माण होतो. म्हणजेच, मागे उभ्या असलेल्या व्यक्तीकडून पिन पाहिले जाण्याची शक्यता असते. मात्र, बायोमेट्रिक प्रमाणीकरणामुळे हा धोका टाळता येणार असून, वापरकर्त्यांची आर्थिक माहिती अधिक सुरक्षित राहणार आहे. तसेच, पिन विसरणे किंवा चुकीचा टाकल्यामुळे व्यवहार अयशस्वी होण्याची समस्या देखील आता मोठ्या प्रमाणात कमी होणार आहे.
या नव्या सुविधेसाठी कंपनीने सुरक्षा लक्षात घेऊन ₹5,000 पर्यंतच्या व्यवहारांची मर्यादा निश्चित केली आहे. वापरकर्ते या मर्यादेपर्यंत बायोमेट्रिकद्वारे थेट पेमेंट करू शकतील. मात्र, ₹5,000 पेक्षा जास्त रकमेच्या व्यवहारांसाठी पूर्वीप्रमाणेच यूपीआय पिन टाकणे अनिवार्य राहणार आहे.
ही सुविधा सुरू करण्यासाठी वापरकर्त्यांनी फोन पे ॲपमध्ये जाऊन प्रोफाइल सेक्शनमधील ‘मॅनेज पेमेंट’ पर्याय निवडावा लागेल. त्यानंतर ‘बायोमेट्रिक पे’ पर्याय सक्षम करून संबंधित बँक खाते निवडावे लागेल. एकदा यूपीआय पिन टाकून पुष्टी केल्यानंतर बायोमेट्रिक पेमेंट सुविधा सक्रिय होईल.
या नव्या फीचरमुळे डिजिटल पेमेंट क्षेत्रात आणखी एक मोठा बदल घडणार असून, व्यवहार अधिक सुरक्षित, जलद आणि वापरकर्त्यांसाठी सोयीस्कर होणार असल्याचे तज्ज्ञांचे मत आहे. भविष्यात बायोमेट्रिक पेमेंट हीच डिजिटल व्यवहारांची नवी ओळख ठरण्याची शक्यता व्यक्त केली जात आहे.
