सिंधुदुर्ग-लाईव्ह ट्रेंड्स न्यूज वृत्तसेवा। भाजपचे ज्येष्ठ नेते, माजी मुख्यमंत्री तथा खासदार नारायण राणे यांच्या तब्येतीबाबत आणि राजकीय निवृत्तीच्या चर्चांबाबत निर्माण झालेल्या संभ्रमावर अखेर स्वतः राणेंनी स्पष्ट भूमिका मांडली आहे. चिपळूण येथील कृषी महोत्सवाच्या कार्यक्रमादरम्यान आलेल्या अस्वस्थतेनंतर सर्वत्र चर्चा सुरू असताना, माझी तब्येत आता पूर्णपणे ठीक आहे आणि मी राजकीय निवृत्तीचे कोणतेही संकेत दिलेले नाहीत, असे स्पष्ट शब्दांत त्यांनी सांगितले.
चिपळूणमधील कार्यक्रमात भाषणाच्या अखेरच्या टप्प्यात नारायण राणेंना अचानक भोवळ आल्यासारखे वाटले होते. त्यांचा आवाज बसल्याने त्यांनी भाषण अर्ध्यावरच थांबवले आणि अस्वस्थतेमुळे माध्यमांशी बोलण्यास नकार दिला. त्यानंतर ते थेट गेस्ट हाऊसकडे रवाना झाले. या घटनेमुळे त्यांच्या तब्येतीबाबत आणि राजकीय भवितव्याबाबत तर्कवितर्कांना उधाण आले होते.
या संदर्भात माध्यमांशी बोलताना नारायण राणेंनी आपली प्रकृती स्पष्ट केली. भाषण करत असताना माझे ब्लड प्रेशर कमी झाले होते आणि डायबेटिसची शुगर सव्वातीनशेच्या पुढे गेली होती. त्यामुळे मला अस्वस्थपणा आणि चक्कर आली. मात्र योग्य उपचारानंतर आता माझी तब्येत ठीक आहे, अशी माहिती त्यांनी दिली. चाहत्यांनी आणि कार्यकर्त्यांनी काळजी करू नये, असे आवाहनही त्यांनी यावेळी केले.
राजकीय निवृत्तीच्या चर्चांवर प्रतिक्रिया देताना नारायण राणे म्हणाले की, निवृत्तीचे संकेत कोणी दिले? मी तसे कुठेही बोललो नाही. माझे वाक्य नीट समजून घ्यावे. जर मी माझ्या पदावर राहून जनतेला परिणामकारक काम देऊ शकलो नाही, तर त्या पदाचा उपयोग काय, असा सवाल मी उपस्थित केला होता. मी निवृत्त होणार असल्याचे कुठेही म्हटलेले नाही, असे त्यांनी स्पष्ट केले.
जर माझ्या पदाचा उपयोग जनतेसाठी होत नसेल किंवा होऊ दिला जात नसेल, तर पूर्णविराम देण्याचा विचार करेन, असे विधान केल्याचे राणेंनी सांगितले. मात्र त्याचा अर्थ राजकारणातून निवृत्ती घेणे असा काढणे चुकीचे आहे. त्यामुळे राजकीय संन्यासाच्या चर्चांना त्यांनी ठाम शब्दांत पूर्णविराम दिला असून आपण सक्रिय राजकारणातच राहणार असल्याचे संकेत दिले आहेत.
दरम्यान, सिंधुदुर्गातील सभेत केलेल्या वक्तव्याबाबतही त्यांनी खुलासा केला. आजही नारायण राणे सामान्य माणसासारखा बाजारात जातो, साधेपणाने जीवन जगतो आणि माणुसकी हाच माझा धर्म आहे, असे सांगताना काही वाक्ये भावनिक पद्धतीने मांडली गेली. त्या वक्तव्याचा अर्थ चुकीच्या पद्धतीने लावण्यात आला असून, त्यामागे निवृत्तीचा कोणताही संकेत नव्हता, असे त्यांनी स्पष्ट केले.
एकूणच, चिपळूणमधील कार्यक्रमादरम्यान आलेली अस्वस्थता ही तात्पुरती होती, सध्या तब्येत ठीक असून राजकीय निवृत्तीबाबत सुरू असलेल्या चर्चांना कोणताही आधार नाही, हे नारायण राणेंनी स्पष्ट केल्याने या विषयावर पडदा पडला आहे.
