सोलापूर, वृत्तसंस्था | केंद्रीय रस्ते वाहतूक मंत्री नितीन गडकरी यांना सोलापूर विद्यापीठाच्या जाहीर कार्यक्रमात भोवळ आल्याची माहिती समोर आली आहे. गडकरी यांना जाहीर कार्यक्रमावेळी भोवळ आल्याची ही तिसरी घटना आहे. त्यामुळे त्यांच्या प्रकृतीविषयी चिंता व्यक्त केली जात आहे.
अहिल्यादेवी होळकर सोलापूर विद्यापीठाच्या कार्यक्रमात आज नितीन गडकरी उपस्थित होते. कार्यक्रमाच्या समारोपावेळी राष्ट्रगीत सुरू असताना गडकरींना भोवळ आली आणि ते खुर्चीवर बसले. राष्ट्रगीत सुरु असल्याने त्यांनी पुन्हा उभे राहण्याचा प्रयत्नही केला. खुर्चीवर बसल्यानंतर त्यांना औषध देण्यात आले व काही वेळाने त्यांना बरं वाटू लागले. यावेळी मंचावर सहकार मंत्री सुभाष देशमुख आणि सोलापूर विद्यापीठाचे कुलगुरू उपस्थित होते. सध्या गडकरी यांची प्रकृती स्थिर असल्याचे समजले आहे.
याआधी नगरमधील राहुरी येथील कृषी विद्यापीठाच्या पदवीदान सोहळ्यादरम्यान भोवळ आल्याने गडकरी यांना रुग्णालयात दाखल करण्यात आले होते. ८ डिसेंबर २०१८ रोजी राहुरीत त्यांना भोवळ आली होती. त्यावेळी तिथे उपस्थित असलेले राज्यपाल विद्यासागर राव यांनी त्यांना सावरले होते. त्यानंतर शिर्डीत २७ एप्रिल २०१९ रोजी लोकसभा निवडणूक प्रचारादरम्यान सदाशिव लोखंडे यांच्या प्रचारसभेत भाषणादरम्यान ते तीन वेळा सरबत प्यायले. मात्र तब्येत जास्त बिघडत असल्याचा अंदाज आल्यानंतर त्यांनी भाषण आटोपते घेतले होते तरी आपल्या जागेवर जाईपर्यंत त्यांना भोवळ आली होती.
