जळगाव-लाईव्ह ट्रेंड्स न्यूज प्रतिनिधी । शहरात अतिक्रमणाविरोधात महापालिकेने सोमवारी (दि. २३ मार्च) कारवाई केली. शहरातील विविध भागांत राबविण्यात आलेल्या या मोहिमेत अनधिकृत अतिक्रमण हटविण्यासोबतच बेकायदेशीर बॅनर काढण्यात आले असून, काही गाड्या आणि काऊंटर जप्त करण्यात आले आहेत.
महापालिकेच्या अतिक्रमण निर्मुलन विभागाच्या वतीने ही कारवाई राबविण्यात आली. रिंग रोड परिसर, आंबेडकर उद्यान परिसर, कन्या शाळा परिसर, मुलींची आयटीआय परिसर या भागांत विशेष मोहीम हाती घेण्यात आली. या ठिकाणी रस्त्यावर अडथळा निर्माण करणाऱ्या गाड्या तसेच एक अनधिकृत काऊंटर जप्त करण्यात आला. यामुळे वाहतुकीला होणारा अडथळा कमी करण्यास मदत झाली.
याशिवाय शहरातील विविध ठिकाणी लावण्यात आलेले एकूण ३२ छोटे-मोठे बॅनर काढून टाकण्यात आले. परवानगीशिवाय लावण्यात आलेल्या या बॅनरमुळे शहराच्या सौंदर्यावर परिणाम होत होता तसेच नागरिकांना त्रास होत असल्याच्या तक्रारी येत होत्या. त्यामुळे महापालिकेने या बॅनरविरोधातही कारवाई केली. इच्छादेवी रोड, महाबळ रोड आणि रिंग रोड परिसरातही अतिक्रमण निर्मुलनाची मोहीम राबविण्यात आली. या कारवाईमुळे रस्ते मोकळे होण्यास मदत झाली असून, नागरिकांमध्ये समाधान व्यक्त केले जात आहे. अतिक्रमणामुळे वाढणारी वाहतूक कोंडी आणि अपघातांचा धोका लक्षात घेता ही मोहीम महत्त्वाची ठरत आहे. ही संपूर्ण कारवाई अतिक्रमण निर्मुलन विभागाचे अधीक्षक संजय ठाकूर यांच्या मार्गदर्शनाखाली पथकाने पार पाडली. आगामी काळातही अशा प्रकारच्या मोहिमा सातत्याने राबविण्यात येणार असल्याचे संकेत देण्यात आले असून, नागरिकांनी नियमांचे पालन करण्याचे आवाहन करण्यात आले आहे.
