यावल–लाईव्ह ट्रेंड्स न्यूज प्रतिनिधी । जळगाव जिल्हा महसूल दिन २०२५ च्या निमित्ताने आयोजित करण्यात आलेल्या जिल्हास्तरीय गौरव समारंभात यावल तालुक्यातील दहिगाव येथे ग्राम महसूल अधिकारी म्हणून कार्यरत असलेल्या मिलिंद वासुदेव कुरकुरे यांना “उत्कृष्ट अधिकारी” म्हणून सन्मानित करण्यात आले. त्यांच्या कार्यक्षेत्रातील जबाबदारी, पारदर्शकता आणि जनतेशी असलेला सकारात्मक संवाद या गुणवत्तांमुळे त्यांना फैजपूर–रावेर उपविभागातून विशेष गौरव प्राप्त झाला आहे.
महसूल दिनाच्या औचित्याने १ ऑगस्ट २०२५ रोजी जिल्हाधिकारी कार्यालय, जळगाव येथे आयोजित करण्यात आलेल्या या गौरव समारंभात राज्याचे जलसंपदामंत्री ना. गिरीश महाजन, जिल्ह्याचे पालकमंत्री ना. गुलाबराव पाटील, वस्त्रोद्योग मंत्री ना. संजय सावकारे, आमदार राजूमामा भोळे, जिल्हाधिकारी आयुष प्रसाद आणि जिल्हा परिषद मुख्य कार्यकारी अधिकारी मिनल करनवाल यांची प्रमुख उपस्थिती लाभली होती. या कार्यक्रमात श्री. कुरकुरे यांना प्रमाणपत्र आणि स्मृतिचिन्ह प्रदान करून त्यांचे कौतुक करण्यात आले.
मिलिंद कुरकुरे यांनी आपल्या कार्यकुशलतेने दहिगाव ग्रामपंचायतीमधील महसूल विषयक कामकाज अधिक सुलभ आणि जनहितकारी पद्धतीने राबवले आहे. शासनाच्या विविध योजना, मालमत्ता नोंदणी, महसूल न्यायालयीन प्रकरणे यांसारख्या बाबतीत त्यांनी वेळेवर आणि अचूक अंमलबजावणी केली आहे. विशेषतः नागरिकाभिमुख सेवेसाठी त्यांनी घेतलेले पुढाकार प्रशासनासाठी प्रेरणादायी ठरले आहेत.
या गौरवाबद्दल यावल महसूल कार्यालयाच्या प्रमुख तहसीलदार मोहनमाला नाझीरकर यांच्यासह विभागातील इतर अधिकारी व कर्मचाऱ्यांनी श्री. कुरकुरे यांचे अभिनंदन केले आहे. त्यांच्या कार्यामुळे महसूल विभागातील कार्यपद्धतीबाबत जनतेत सकारात्मक दृष्टिकोन निर्माण झाला आहे.
हा सन्मान केवळ एक व्यक्तीपुरता मर्यादित नसून, तो एकूणच प्रशासनातील कार्यक्षमतेचे प्रतीक असून, इतर अधिकारी-कर्मचाऱ्यांनाही प्रेरणा देणारा ठरला आहे.
