भुसावळ-लाईव्ह ट्रेंडस न्यूज प्रतिनिधी । जळगाव जिल्ह्यातील हतनूर धरणाचे आज २४ दरवाजे उघडण्यात आले आहेत, ज्यामुळे तापी नदीला मोठ्या प्रमाणावर पूर आला आहे. धरणाच्या १६ दरवाजांमधून पूर्ण क्षमतेने, तर उर्वरित ८ दरवाजांमधून १ मीटरने पाण्याचा विसर्ग सुरू आहे. सद्यस्थितीत धरणातून तब्बल १ लाख २५ हजार क्युसेक इतका प्रचंड पाण्याचा विसर्ग तापी नदीपात्रात सोडण्यात येत आहे. यामुळे नदीकाठच्या गावांमध्ये पूरस्थिती निर्माण होण्याची शक्यता असल्याने प्रशासनाने नागरिकांना सतर्कतेचा इशारा दिला आहे.
गेल्या काही दिवसांपासून विदर्भ, मध्य प्रदेश आणि जळगाव जिल्ह्यामध्ये सुरू असलेल्या मुसळधार पावसामुळे हतनूर धरणात पाण्याची आवक मोठ्या प्रमाणात वाढली आहे. पाण्याची वाढती आवक लक्षात घेता, पाटबंधारे विभागाने धरणाचे दरवाजे उघडण्याचा निर्णय घेतला. सद्यस्थितीत २८ पैकी २४ दरवाजे उघडण्यात आले असून, पाण्याचा मोठ्या प्रमाणावर विसर्ग सुरू आहे.
प्रशासनाच्या वतीने तापी नदीकाठच्या सर्व गावांना सतर्कतेचा इशारा देण्यात आला आहे. तसेच, स्थानिक प्रशासनालाही जिल्हा प्रशासनाने सतर्क राहण्याच्या सूचना दिल्या आहेत. नदीपात्रात न जाण्याबाबत आणि योग्य ती खबरदारी घेण्याबाबत नागरिकांना आवाहन करण्यात आले आहे.
पाटबंधारे विभागाने दिलेल्या माहितीनुसार, धरणात पाण्याची आवक आणखी वाढल्यास, पाण्याचा विसर्गही वाढवण्याची शक्यता वर्तवण्यात आली आहे. त्यामुळे तापी नदीच्या पाणीपातळीत आणखी वाढ होण्याची शक्यता आहे. नदीकाठच्या परिसरातील नागरिकांनी कोणत्याही अफवांवर विश्वास न ठेवता, प्रशासनाकडून देण्यात येणाऱ्या सूचनांचे पालन करावे, असे आवाहन जिल्हा प्रशासनाने केले आहे.
