बुलढाणा-लाईव्ह ट्रेंडस न्यूज प्रतिनिधी । ऊर्जा संशोधन आणि धोरण विकास क्षेत्रातील सहकार्यासाठी महाराष्ट्र शासनाने बर्कले येथील जागतिक किर्तीच्या कॅलिफोर्निया विद्यापीठाशी (युनिव्हर्सिटी ऑफ कॅलिफोर्निया, बर्कले) महत्त्वपूर्ण सामंजस्य करार केला आहे. विधानभवनातील मंत्रिमंडळ सभागृहात मुख्यमंत्री देवेंद्र फडणवीस यांच्या प्रमुख उपस्थितीत गुरुवारी हा ऐतिहासिक कार्यक्रम पार पडला. यावेळी कॅलिफोर्निया विद्यापीठाचे प्रतिनिधी आणि इतर अनेक मान्यवर उपस्थित होते.
या सोहळ्याला ऊर्जा राज्यमंत्री मेघना बोर्डीकर, ऊर्जा विभागाच्या अपर मुख्य सचिव आभा शुक्ला, महावितरणचे अध्यक्ष तथा व्यवस्थापकीय संचालक लोकेश चंद्र, महानिर्मितीचे अध्यक्ष तथा व्यवस्थापकीय संचालक राधाकृष्ण बी, आणि महापारेषणचे अध्यक्ष तथा व्यवस्थापकीय संचालक संजीव कुमार यांची उपस्थिती होती. श्रीमती आभा शुक्ला आणि कॅलिफोर्निया विद्यापीठाचे वरिष्ठ सल्लागार मोहित भार्गव यांनी या सामंजस्य करारावर स्वाक्षरी केली.
कराराचे उद्दिष्ट आणि फायदे
या करारामुळे महाराष्ट्रातील ऊर्जा क्षेत्रात संशोधन, तांत्रिक नवकल्पना (इनोव्हेशन) आणि धोरणात्मक सहकार्याला गती मिळणार आहे. ऊर्जेचा स्वच्छ, विश्वासार्ह आणि परवडणारा पुरवठा सुनिश्चित करणे, ऊर्जा साठवणूक उपाययोजना विकसित करणे, वीज बाजार रचनेत सुधारणा करणे, ग्रीड प्रसारण प्रणालीतील सुधारणा, हवामानाशी जुळवून घेणारी धोरणे आणि प्रशिक्षण कार्यक्रम यांसारख्या विविध क्षेत्रांमध्ये दोन्ही संस्था संयुक्तपणे काम करतील.
मुख्यमंत्री देवेंद्र फडणवीस यांनी या प्रसंगी बोलताना सांगितले की, “कॅलिफोर्निया विद्यापीठासारख्या नामांकित संस्थेच्या सहकार्यामुळे महाराष्ट्राच्या ऊर्जा क्षेत्रात जागतिक दर्जाचे संशोधन आणि नवसंशोधनाला चालना मिळेल. या सामंजस्य करारामार्फत ऊर्जा साठवणूक, वीज बाजार, प्रसारण व्यवस्था आणि हवामान बदलाशी जुळवून घेणे यांसारख्या अत्यंत महत्त्वाच्या क्षेत्रांमध्ये संयुक्त संशोधन, ज्ञानाची देवाणघेवाण आणि क्षमतावृद्धी यांना प्रोत्साहन मिळणार आहे. हे सहकार्य स्वच्छ, विश्वासार्ह आणि शाश्वत ऊर्जेच्या दिशेने एक नवा अध्याय सुरू करत आहे.”
परस्पर विश्वास आणि भविष्यातील शक्यता
महाराष्ट्र सरकार आणि कॅलिफोर्निया विद्यापीठ, बर्कले यांच्यातील हे सहकार्य परस्पर विश्वास, समानता आणि सामूहिक हिताच्या तत्त्वांवर आधारित असून, राज्याच्या ऊर्जा क्षेत्रातील बदलत्या गरजांनुसार स्थानिक उपाययोजना विकसित करण्यावर या करारामध्ये भर दिला जाणार आहे.
ऊर्जा विभागाच्या अपर मुख्य सचिव आभा शुक्ला यांनी सांगितले की, हा करार लवचिक स्वरूपाचा असून, भविष्यातील प्रकल्पांनुसार सहकार्याचे दरवाजे खुले राहतील. या करारामुळे महाराष्ट्रातील शैक्षणिक संस्था, संशोधन केंद्रे आणि प्रशासन यांना नवसंशोधन, क्षमतावृद्धी व प्रशिक्षणाची संधी मिळणार आहे, ज्यामुळे पर्यावरणस्नेही आणि शाश्वत ऊर्जेच्या दिशेने राज्याचा प्रवास अधिक गतिमान होईल, असा विश्वास त्यांनी व्यक्त केला.
