बेंगळुरू, वृत्तसंस्था | भारताच्या महत्त्वाकांक्षी चांद्रयान-२ मोहिमेत आजचा दिवस अतिशय महत्त्वाचा आहे. आज दुपारी १ वाजून १५ मिनिटांच्या सुमारास मुख्य यानातून लँडर विक्रम यशस्वीपणे वेगळे झाले आहे. भारतीय अवकाश संशोधन संस्थेने (इस्रो) ट्विटरवरून याबाबत माहिती दिली आहे.
आता खऱ्या अर्थाने चांद्रयान-२ चा टप्पा सुरू झाला असे म्हटले जात आहे. चांद्रयानामधून वेगळ्या झालेल्या लँडरमधून रोव्हर विक्रम येत्या ७ सप्टेंबर रोजी चंद्रावर उतरणार आहे. चांद्रयान-२ ने यापूर्वीच चंद्राच्या पाचव्या कक्षेत प्रवेश केला आहे. आज चांद्रयान-२ मधून लँडर विक्रम आणि रोव्हर प्रज्ञान वेगळे झाले. ७ सप्टेंबरला चांद्रयान-२ चंद्रावर उतरणार आहे. शनिवारी वैज्ञानिकांची उच्चस्तरीय बैठक झाली. चांद्रयानाने चंद्राच्या पाचव्या कक्षेत प्रवेश केल्यानंतर लँडर आणि रोव्हरला वेगळे करण्याचा निर्णय घेतला गेला. या कक्षेपासून चंद्राचे अंतर अवघे १०९ किलोमीटर आहे.
