जळगाव-लाईव्ह ट्रेंड्स न्यूज प्रतिनिधी | जळगावच्या वैद्यकीय क्षेत्रासाठी अभिमानाची बातमी ठरावी असा ऐतिहासिक विजय डॉ. अनिल भास्कर पाटील यांनी नोंदवला आहे. प्रतिष्ठेच्या महाराष्ट्र वैद्यकीय परिषद (एमएमसी) निवडणूक २०२६ मध्ये त्यांनी विक्रमी यश मिळवत राज्यात सहावा क्रमांक पटकावला आहे. विशेष म्हणजे, जळगाव जिल्ह्यातून थेट निवडणुकीद्वारे निवडून जाणारे ते पहिलेच सदस्य ठरले आहेत.
संपूर्ण राज्यातील लाखो डॉक्टरांचे प्रतिनिधित्व करणाऱ्या या निवडणुकीत ६० उमेदवार रिंगणात होते. २६ एप्रिल रोजी जिल्हाधिकाऱ्यांच्या देखरेखीखाली मतदान प्रक्रिया पार पडली. त्यानंतर २९ आणि ३० एप्रिल रोजी झालेल्या मतमोजणीत डॉ. पाटील यांच्या विजयावर शिक्कामोर्तब झाले. निर्वाचन अधिकारी सुनीलकुमार धोंडे यांनी अधिकृत घोषणेनंतर खान्देशातील वैद्यकीय वर्तुळात आनंदाचे वातावरण पसरले.
या विजयामागे डॉ. अनिता भोळे यांची रणनीती महत्त्वाची ठरली. त्यांनी संपूर्ण प्रचार मोहिमेचे नियोजन करत राज्यभर संपर्क जाळे उभे केले. आधुनिक तंत्रज्ञान आणि वैयक्तिक संवाद यांचा योग्य वापर करून मतदारांपर्यंत पोहोचण्यात यश मिळाले.
या प्रवासात गोदावरी फाउंडेशनचे डॉ. उल्हास पाटील आणि डॉ. वर्षा पाटील यांचेही मोलाचे मार्गदर्शन लाभले. आयएमए जळगावसह जिल्ह्यातील अनेक डॉक्टरांनी एकजुटीने काम करत हा विजय साकारला.
डॉ. पाटील यांच्या निवडीमुळे जळगाव जिल्ह्याला राज्यस्तरावर भक्कम प्रतिनिधित्व मिळणार असून, डॉक्टरांच्या समस्या आणि आरोग्य क्षेत्रातील धोरणात्मक बदलांमध्ये आता जळगावचा आवाज अधिक प्रभावी ठरणार आहे.
