जळगाव-लाईव्ह ट्रेंड्स न्यूज प्रतिनिधी । जिल्ह्यात अमली पदार्थांच्या अवैध व्यापाराविरोधात स्थानिक गुन्हे शाखा (एलसीबी) आणि एमआयडीसी पोलिसांनी संयुक्तपणे मोठी कारवाई करत एमडी (Mephedrone) या घातक अमली पदार्थाची तस्करी उधळून लावली. या कारवाईत 62.07 ग्रॅम एमडीसह एका आरोपीला अटक करण्यात आली असून, एकूण ₹3 लाख 58 हजारांचा मुद्देमाल जप्त करण्यात आला आहे. तपासादरम्यान या अमली पदार्थाचा पुरवठा करणाऱ्या दुसऱ्या आरोपीचाही सहभाग समोर आल्याने त्याच्याविरोधातही गुन्हा दाखल करण्यात आला आहे.
पोलिसांनी दिलेल्या माहितीनुसार, दिनांक 31 जुलै 2026 रोजी रात्री सुमारे 10.40 वाजण्याच्या सुमारास एमआयडीसी पोलीस स्टेशन हद्दीतील वखार महामंडळ (एफसीआय गोडाऊन) सेक्टर क्रमांक A-14 समोरील रस्त्यावर एलसीबीचे पथक गस्त घालत होते. यावेळी संशयास्पद हालचाली करणाऱ्या एका इसमाची झडती घेतली असता त्याच्याकडे एमडी (Mephedrone) हा मानवी आरोग्यास अत्यंत घातक अमली पदार्थ आढळून आला. पोलिसांनी तत्काळ आरोपीला ताब्यात घेऊन संपूर्ण मुद्देमाल जप्त केला.
या कारवाईत इम्रान खान हयात खान (वय 36, मूळ रा. आडगाव, ता. जळगाव, सध्या रा. करीम नगर, फातिमा नगर, एमआयडीसी, जळगाव) याला अटक करण्यात आली. पुढील तपासात जप्त करण्यात आलेला एमडी हा रफीक उर्फ गोल्डन (रा. मालेगाव, जि. नाशिक) याने विक्रीसाठी उपलब्ध करून दिल्याचे निष्पन्न झाल्याने त्याच्याविरुद्धही गुन्हा दाखल करण्यात आला असून त्याचा शोध सुरू आहे.
झडतीदरम्यान पोलिसांनी आरोपीकडून 39.06 ग्रॅम एमडी (अंदाजे किंमत ₹1,96,000), 11 प्लास्टिक पिशव्यांमधील 9.10 ग्रॅम एमडी (₹36,000) तसेच 18 प्लास्टिक पिशव्यांमधील 13.91 ग्रॅम एमडी (₹56,000) असा एकूण 62.07 ग्रॅम एमडी अमली पदार्थ जप्त केला. या अमली पदार्थाची एकूण किंमत ₹2 लाख 88 हजार इतकी आहे. याशिवाय आरोपीकडून रिअलमी कंपनीचा मोबाईल फोन (₹20,000) आणि हिरो होंडा स्प्लेंडर मोटारसायकल (₹50,000) जप्त करण्यात आली. अशाप्रकारे एकूण ₹3 लाख 58 हजारांचा मुद्देमाल पोलिसांनी हस्तगत केला.
या प्रकरणी एमआयडीसी पोलीस ठाण्यात गुन्हा रजिस्टर क्रमांक 635/2026 अन्वये अमली पदार्थ विरोधी कायदा (NDPS Act, 1985) अंतर्गत कलम 8(क), 22(क), 29 तसेच भारतीय न्याय संहिता (BNS) कलम 3(5) नुसार गुन्हा दाखल करण्यात आला आहे. या गुन्ह्याचे फिर्यादी स्थानिक गुन्हे शाखेचे सहाय्यक पोलीस फौजदार अतुल रघुनाथ वंजारी असून, पुढील तपास पोलीस उपनिरीक्षक दीपक जगदाळे करीत आहेत. या कारवाईमुळे जळगाव जिल्ह्यातील अमली पदार्थ तस्करांमध्ये मोठी खळबळ उडाली असून, या रॅकेटशी संबंधित आणखी धागेदोरे समोर येण्याची शक्यता पोलिसांनी व्यक्त केली आहे. जळगाव पोलिसांनी नागरिकांना आवाहन करत अमली पदार्थांच्या अवैध व्यापाराविषयी कोणतीही माहिती मिळाल्यास निर्भयपणे पोलिसांना कळविण्याचे आवाहन केले आहे. समाजातील युवकांना व्यसनापासून दूर ठेवण्यासाठी आणि अमली पदार्थांच्या साखळीचा समूळ नायनाट करण्यासाठी पोलीस प्रशासनाची धडक मोहीम पुढेही सुरू राहणार असल्याचा निर्धार व्यक्त करण्यात आला आहे. अमली पदार्थांविरोधातील या कारवाईमुळे जळगाव पोलिसांची सतर्कता पुन्हा एकदा अधोरेखित झाली असून, गुन्हेगारीवर कठोर कारवाई करण्याच्या भूमिकेला बळ मिळाले आहे.
