जळगाव-लाईव्ह ट्रेंड्स न्यूज प्रतिनिधी । समाजातील विवाह इच्छुक युवक-युवतींना एकाच व्यासपीठावर सुयोग्य जोडीदार मिळावा आणि पालकांचा वेळ, श्रम व खर्च वाचावा या सामाजिक उद्देशाने जळगाव जिल्हा चर्मकार विकास संघातर्फे तृतीय निःशुल्क आंतरराज्यीय वधू-वर-पालक परिचय मेळाव्याचे आयोजन करण्यात आले आहे. हा मेळावा रविवार, २ नोव्हेंबर २०२५ रोजी सकाळी १० वाजता लेवा भवन येथे पार पडणार आहे.
या मेळाव्यात चर्मकार समाजातील विविध जाती, पोटजाती तसेच सर्वसमावेशक घटक घटस्फोटित, विधवा, विधुर, अंध, अपंग, मूकबधिर आदींसाठीही सहभागाचे दार खुले ठेवण्यात आले आहे. समाजातील सर्व घटकांना समान संधी मिळावी या हेतूने हा मेळावा व्यापक पातळीवर आयोजित करण्यात आला असून, महाराष्ट्र, मध्यप्रदेश, गुजरात आणि इतर राज्यांतील समाजबांधव या कार्यक्रमात सहभागी होणार आहेत.
या सामाजिक उपक्रमाच्या प्रमुख उपस्थितीत मंत्री ना. संजय सावकारे, ना. गिरीश महाजन, ना. गुलाबराव पाटील, तसेच खासदार स्मिता वाघ, आमदार राजुमामा भोळे, आमदार प्रा. चंद्रकांत सोनवणे, आमदार चंद्रकांत पाटील, आमदार किशोर पाटील आदी मान्यवर उपस्थित राहणार आहेत. याशिवाय माजी महापौर विष्णू भंगाळे, डॉ. केतकी पाटील तसेच समाजातील विविध अधिकारी, पदाधिकारी आणि मान्यवर या कार्यक्रमात सहभागी होणार आहेत.
या मेळाव्याच्या आयोजनात चर्मकार विकास संघाचे प्रदेशाध्यक्ष संजय खामकर, प्रदेश उपाध्यक्ष विश्वनाथ सावकारे, राज्य कार्यकारिणी सदस्य संजय वानखेडे, राज्य संघटक डॉ. संजय भटकर, प्रदेश सहसचिव ॲड. चेतन तायडे, जिल्हाध्यक्ष ॲड. अर्जुन भारुळे, कार्याध्यक्ष राजेश वाडेकर, सचिव प्रा. धनराज भारुळे, तसेच केशव ठोसरे, बाळकृष्ण खिरोळे, वसंतराव नेटके, काशीनाथ इंगळे, राजेंद्र बावस्कर, कैलास वाघ, मनोज सोनवणे, पंकज तायडे, शिवदास कळसकर, प्रशांत सोनवणे यांचा विशेष सहभाग आहे.
समाजातील युवक-युवतींच्या विवाहासाठी हा मेळावा एक प्रभावी व्यासपीठ ठरणार असून, परस्पर परिचयातून नवे नाते जुळण्यास मदत होईल. विवाह इच्छुक युवक-युवतींनी आणि त्यांच्या पालकांनी या सामाजिक मेळाव्यात प्रत्यक्ष उपस्थित राहून लाभ घ्यावा, असे आवाहन आयोजकांनी केले आहे.
एकूणच, हा तृतीय आंतरराज्यीय निःशुल्क परिचय मेळावा समाजातील एकात्मता, सहकार्य आणि सामाजिक बांधिलकीचे उत्कृष्ट उदाहरण ठरणार आहे. विवाहसंस्थेला नवी दिशा देणारा हा प्रयत्न जळगावात सामाजिक सलोखा आणि एकतेचा संदेश देणार आहे.
