मुंबई-लाईव्ह ट्रेंड्स न्यूज वृत्तसेवा । न्यूझीलंडविरुद्धच्या एकदिवसीय मालिकेसाठी भारतीय क्रिकेट संघाची अधिकृत घोषणा झाल्यानंतर पहिल्या सामन्यासाठीच्या अंतिम अकराबाबत चर्चा रंगू लागली आहे. शुभमन गिलच्या नेतृत्वाखाली टीम इंडिया मैदानात उतरणार असून संघातील बहुतांश जागा निश्चित असल्या तरी दोन महत्त्वाच्या स्थानांवर अद्याप संभ्रम कायम आहे.
न्यूझीलंडविरुद्धच्या या मालिकेसाठी युवा कर्णधार शुभमन गिलवर मोठी जबाबदारी देण्यात आली आहे. उपकर्णधार म्हणून श्रेयस अय्यरचे संघात पुनरागमन झाले असले, तरी त्याच्या फिटनेसवर प्रश्नचिन्ह आहे. त्याचसोबत अनुभवी वेगवान गोलंदाज मोहम्मद सिराजलाही पुन्हा संघात संधी देण्यात आली आहे, त्यामुळे वेगवान माऱ्याची धार अधिक वाढलेली दिसते.
कर्णधार शुभमन गिलच्या पुनरागमनामुळे भारताची टॉप ऑर्डर जवळपास निश्चित झाली आहे. गिल सलामीला माजी कर्णधार रोहित शर्मासोबत डावाची सुरुवात करेल. त्यानंतर क्रमांक तीनवर विराट कोहलीची जागा अढळ आहे. विराट सध्या जबरदस्त फॉर्ममध्ये असून त्याने मागील चार वनडे डावांत सलग 50 पेक्षा जास्त धावा केल्या आहेत, त्यात दोन शतकांचाही समावेश आहे. त्यामुळे न्यूझीलंडच्या गोलंदाजांसमोर भारताचा वरचा क्रम मोठे आव्हान ठरणार आहे.
संघातील सर्वात मोठा प्रश्न उपकर्णधार श्रेयस अय्यरच्या फिटनेसबाबत आहे. तो पूर्णपणे तंदुरुस्त असल्यास क्रमांक चारवर त्याची निवड जवळपास निश्चित मानली जात आहे. मात्र त्याला फिटनेस क्लिअरन्स न मिळाल्यास ही जागा ऋषभ पंतकडे जाऊ शकते. पंतने आतापर्यंत 31 वनडे सामन्यांत एक शतक आणि पाच अर्धशतके झळकावत आपली क्षमता सिद्ध केली आहे. दुसरीकडे, श्रेयस अय्यर केवळ 83 धावांवर 3000 वनडे धावांचा टप्पा गाठण्याच्या उंबरठ्यावर आहे.
मधल्या आणि खालच्या फळीत फिनिशरच्या भूमिकेबाबतही काहीशी चिंता आहे. केएल राहुल पाचव्या किंवा सहाव्या क्रमांकावर फलंदाजी करताना दिसेल आणि यष्टीरक्षकाची जबाबदारीही सांभाळेल. शेवटच्या षटकांत धावा काढण्याची जबाबदारी रवींद्र जडेजा आणि वॉशिंग्टन सुंदर यांच्यावर असेल. मात्र दोघेही मोठे फटके मारण्यात फारसे आक्रमक मानले जात नाहीत, त्यामुळे संघ व्यवस्थापन नितीश कुमार रेड्डीचा पर्याय गांभीर्याने विचारात घेत आहे. रेड्डी खालच्या फळीत आक्रमक फलंदाजीसोबत मध्यमगती गोलंदाजीही करू शकतो.
फिरकी विभागात कुलदीप यादव हा संघातील एकमेव तज्ज्ञ स्पिनर असण्याची दाट शक्यता आहे. जडेजा आणि सुंदर हे अष्टपैलू म्हणून खेळतील, मात्र कुलदीपवर फिरकीचा मुख्य भार असेल. दक्षिण आफ्रिकेविरुद्धच्या मागील मालिकेत कुलदीपने तीन सामन्यांत 9 विकेट्स घेतल्या होत्या आणि त्याची डावखुऱ्या हाताची फिरकी न्यूझीलंडच्या फलंदाजांना अडचणीत टाकू शकते.
वेगवान गोलंदाजी विभागातही चुरस पाहायला मिळत आहे. अर्शदीप सिंग, हर्षित राणा, प्रसिद्ध कृष्णा आणि मोहम्मद सिराज असे चार पर्याय उपलब्ध आहेत. मागील मालिकेत विश्रांतीवर असलेला सिराज पुन्हा अंतिम अकरात परतण्याची शक्यता आहे. दक्षिण आफ्रिकेविरुद्ध महागडा ठरलेला प्रसिद्ध कृष्णा बाहेर बसू शकतो. नव्या चेंडूवर स्विंग मिळवण्यात सिराज तज्ज्ञ असून तो एकेकाळी वनडे क्रमवारीत नंबर-1 गोलंदाजही राहिला आहे.
सिराजला साथ देण्यासाठी हर्षित राणा आणि अर्शदीप सिंग यांना संधी मिळू शकते. हर्षितने मागील मालिकेत नव्या चेंडूवर प्रभावी गोलंदाजी केली होती, तर अर्शदीपने पाच विकेट्स घेत आपल्या फॉर्मची झलक दाखवली होती. त्यामुळे भारताचा वेगवान मारा संतुलित आणि धारदार दिसत आहे.
