मुंबई–लाईव्ह ट्रेंड्स न्यूज वृत्तसेवा । बॉलिवूडमध्ये आपली स्वतंत्र ओळख निर्माण करणाऱ्या ज्येष्ठ अभिनेत्री रेणुका शहाणे यांनी अलीकडेच आपल्या कारकिर्दीच्या सुरुवातीच्या काळातील एक धक्कादायक अनुभव उघड केला आहे. ‘हम आपके हैं कौन’मधील सलमान खानच्या वहिनीची भूमिका आणि ‘सर्कस’ सारख्या मालिकांमुळे घराघरात पोहोचलेल्या या अभिनेत्रीने एका विवाहित निर्मात्याने दिलेल्या अश्लील प्रस्तावाचा खुलासा करून सर्वांना स्तब्ध केले आहे.
रेणुका शहाणे यांनी एका मुलाखतीत सांगितले की, त्यांच्या करिअरच्या सुरुवातीच्या काळात एक निर्माता थेट त्यांच्या घरी आला आणि त्याने अत्यंत घृणास्पद प्रस्ताव दिला. तो म्हणाला, “मी विवाहित आहे, पण तुला एका साडी ब्रँडची ब्रँड अॅम्बेसेडर बनवू इच्छितो. त्यासाठी फक्त माझ्यासोबत राहा, मी तुला दर महिन्याला पगार देईन.” हा प्रस्ताव ऐकून मी आणि माझी आई दोघीही अक्षरशः सुन्न झालो, असे रेणुका म्हणाल्या. त्यांनी त्या क्षणीच स्पष्ट शब्दांत नकार दिला आणि त्या निर्मात्याला घराबाहेर जाण्यास सांगितले.
रेणुका शहाणे पुढे म्हणाल्या की, या उद्योगात विरोध केला की शक्तिशाली लोक आपले काम अडवतात. “अशा लोकांचा अहंकार दुखावला की ते बदला घेण्याची संधी शोधतात. ‘या व्यक्तीला काम देऊ नका’ असे सांगून कलाकाराचा प्रवास रोखण्याचा प्रयत्न होतो,” असे त्यांनी सांगितले. त्यांच्या बाबतीत तसे घडले नाही, मात्र अनेक नवोदित कलाकारांना अशा प्रकारच्या दडपणाला सामोरे जावे लागते, हे त्यांनी स्पष्ट केले.
रेणुकांनी मनोरंजनसृष्टीतील आणखी एक कटू सत्य मांडले. त्यांनी सांगितले की, छळाची तक्रार करणाऱ्यांनाच अनेकदा उलट त्रास दिला जातो. “पीडितेला प्रकल्पातून काढून टाकले जाते, केलेल्या कामाचे पैसे रोखले जातात, आणि तिच्याविरुद्ध खोटे आरोप केले जातात. उद्योगातील काही प्रभावशाली गट एकत्र येऊन पीडितेला आणखी छळतात,” असे त्यांनी सांगितले.
#MeToo चळवळीबाबत बोलताना रेणुका शहाणे म्हणाल्या की, “#MeToo नंतर काही काळ चर्चा झाली, पण आता पुन्हा अनेक आरोपी मोठ्या प्रकल्पांमध्ये दिसू लागले आहेत. लोकांनी सर्व काही विसरलं आहे. आणि जर पुरावे किंवा पोलीस केस नसेल, तर लोक उलट पीडितेच्याच निष्ठेबद्दल प्रश्न विचारतात.”
रेणुका शहाणे यांनी मांडलेला हा अनुभव पुन्हा एकदा बॉलिवूडच्या कडवट वास्तवाचे दर्शन घडवतो. त्यांच्या प्रामाणिक कबुलीमुळे कलाकारांच्या सुरक्षिततेचा आणि सन्मानाचा प्रश्न पुन्हा एकदा चर्चेत आला आहे.
