मुक्ताईनगर-लाईव्ह ट्रेंड्स न्यूज प्रतिनिधी । इंदोर–हैदराबाद मार्गावरील राष्ट्रीय महामार्ग 753L च्या बांधकामाविरोधात मुक्ताईनगर परिसरातील शेतकऱ्यांनी तीव्र आंदोलन छेडत सुरू असलेले काम बंद पाडले. भूसंपादनाचा कायदेशीर व योग्य मोबदला अद्याप न मिळाल्याने संतप्त शेतकऱ्यांनी आक्रमक भूमिका घेतली.
रामभाऊ राणे या शेतकऱ्यांच्या शेतातून उभ्या करण्यात आलेल्या रस्त्यावर आज आंदोलनकर्त्यांनी स्वतःच्या खर्चाने जेसीबी मशीन लावून सुरू असलेले बांधकाम उकरून टाकले. उभ्या पिकांमध्ये थेट यंत्रसामग्री घालून काम सुरू केल्याने पिकांचे मोठे नुकसान झाल्याचा आरोप शेतकऱ्यांनी केला आहे.
शेतकऱ्यांच्या म्हणण्यानुसार, त्यांच्या जमिनीचे संपादन अत्यंत कमी दराने जाहीर करण्यात आले असून तो मोबदला प्रत्यक्षात खात्यावर जमा झालेला नाही. गेल्या दोन महिन्यांपासून प्रशासनाकडे पाठपुरावा करूनही ठोस निर्णय न झाल्याने त्यांनी आंदोलनाचा मार्ग स्वीकारला.
“जोपर्यंत पूर्ण व न्याय्य मोबदला मिळत नाही, तोपर्यंत महामार्गाचे काम सुरू होऊ देणार नाही,” असा इशारा आंदोलनकर्त्यांनी दिला आहे.
या घटनेमुळे परिसरात तणावाचे वातावरण निर्माण झाले असून महामार्गावरील काम ठिकठिकाणी ठप्प झाले आहे. प्रशासनाने तातडीने हस्तक्षेप करून शेतकऱ्यांशी चर्चा करावी व प्रलंबित मोबदल्याचा प्रश्न निकाली काढावा, अशी मागणी स्थानिकांकडून होत आहे. संबंधित विभागाकडून अद्याप अधिकृत प्रतिक्रिया मिळालेली नाही.
