यावल-लाईव्ह ट्रेंड्स न्यूज प्रतिनिधी । यावल ते भुसावळ या महत्त्वाच्या राज्य मार्गावर क्षमतेपेक्षा अधिक अवजड वाहनांची वाढती वाहतूक ही रस्त्याच्या दुरवस्थेसह जीवघेण्या अपघातांचे प्रमुख कारण ठरत असल्याचे चित्र सध्या दिसून येत आहे. या मार्गावरून मोठ्या प्रमाणात कंटेनर व अन्य अवजड वाहने धावू लागल्याने नागरिकांमध्ये भीतीचे वातावरण निर्माण झाले असून, उपप्रादेशिक परिवहन विभागाने तातडीने लक्ष देऊन या मार्गावर अवजड वाहनांच्या वाहतुकीवर बंदी घालावी, अशी जोरदार मागणी वाहनधारक व स्थानिक नागरिकांकडून होत आहे.
यावल ते भुसावळ दरम्यानच्या राज्य मार्गाची रचना मर्यादित क्षमतेची असताना, त्यावर क्षमतेपेक्षा अधिक वजनाची वाहने नियमितपणे धावत आहेत. यामुळे रस्त्यावर प्रचंड ताण येत असून, ठिकठिकाणी मोठे खड्डे पडत आहेत. परिणामी रस्त्याची संरचना खराब होऊन तो लवकरच नादुरुस्त होत आहे. या रस्त्याची दुरवस्था वाढत चालल्याने वाहनचालकांना मोठ्या अडचणींचा सामना करावा लागत आहे.
खड्ड्यांमुळे उन्हाळ्यात मोठ्या प्रमाणात धूळ उडून प्रदूषण वाढत असून, पावसाळ्यात चिखलाचे साम्राज्य पसरते. या परिस्थितीत दुचाकी वाहनचालकांचे अपघात मोठ्या प्रमाणात होत असून, आतापर्यंत अनेक निरपराध नागरिकांना आपला जीव गमवावा लागला आहे. विशेषतः कंटेनरसारख्या अवजड वाहनांमुळेच बहुतांश अपघात घडत असल्याचे स्थानिकांकडून सांगण्यात येत आहे.
रस्त्याच्या क्षमतेपेक्षा जास्त वजनाची वाहने केवळ रस्त्याचे नुकसान करत नाहीत, तर सार्वजनिक आरोग्य आणि पर्यावरणावरही त्याचा विपरीत परिणाम होत आहे. धूळ, प्रदूषण, आवाज आणि सतत होणारे अपघात यामुळे परिसरातील नागरिकांचे दैनंदिन जीवन धोक्यात आले आहे. या पार्श्वभूमीवर उपप्रादेशिक परिवहन विभागाने रस्ते नियम अधिक कठोरपणे राबवावेत, अशी अपेक्षा व्यक्त होत आहे.
चोपडा, यावल आणि भुसावळ या मार्गावरून रस्त्याच्या क्षमतेपेक्षा अधिक वजनाची वाहने धावण्यास बंदी घालून, अशा अवजड वाहनांची वाहतूक पर्यायी मार्गाने वळवावी, अशी मागणी जोर धरू लागली आहे. त्यामुळे रस्त्याची वारंवार दुरुस्ती टाळता येईल तसेच अपघातांची संख्या कमी होण्यास मदत होईल, असे मत नागरिकांकडून व्यक्त केले जात आहे.
या गंभीर समस्येकडे दुर्लक्ष न करता जळगाव उपप्रादेशिक परिवहन विभागाने तातडीने निर्णय घेऊन ठोस उपाययोजना कराव्यात, अन्यथा भविष्यात आणखी गंभीर दुर्घटना घडण्याची शक्यता नाकारता येत नाही, अशी भावना स्थानिक नागरिकांमध्ये व्यक्त होत आहे.
