जळगाव-लाईव्ह ट्रेंडस न्यूज प्रतिनिधी । जळगाव जिल्ह्यात सध्या तापमानात मोठी वाढ झाली आहे. दुपारच्या वेळी तापमान अधिक असल्याने नागरिकांनी उन्हाळ्यात स्वतःचा बचाव करण्यासाठी आवश्यक ती खबरदारी घ्यावी आणि आपल्या आरोग्याची काळजी घ्यावी, असे आवाहन जिल्हाधिकारी आयुष प्रसाद यांनी ‘लाईव्ह ट्रेंडस न्यूज’शी बोलताना केले आहे.
जिल्हाधिकारी आयुष प्रसाद म्हणाले, “जळगाव जिल्ह्यात सध्या उष्णतेची लाट आहे. दुपारच्या वेळी तापमान खूप जास्त असते. त्यामुळे नागरिकांनी विशेष काळजी घेणे आवश्यक आहे. उन्हाच्या वेळी शक्यतोवर घराबाहेर पडणे टाळावे. जर कामासाठी बाहेर जाणे गरजेचे असेल, तर डोक्यावर टोपी किंवा रुमाल बांधावा. तसेच, हलक्या रंगाचे आणि सैलसर कपडे परिधान करावेत.”
त्यांनी पुढे सांगितले की, उन्हाळ्यात शरीरातील पाण्याची पातळी कमी होण्याची शक्यता असते. त्यामुळे नागरिकांनी दिवसभर पुरेसे पाणी प्यावे. लिंबू सरबत, ताक, नारळ पाणी यांसारख्या पेयांचे सेवन करावे. तेलकट आणि मसालेदार पदार्थांचे सेवन टाळावे. लहान मुले आणि ज्येष्ठ नागरिकांनी विशेष काळजी घ्यावी आणि त्यांना उन्हाच्या संपर्कात जास्त वेळ राहू देऊ नये, असे आवाहनही त्यांनी केले.
जिल्हाधिकारी आयुष प्रसाद यांनी नागरिकांना उष्माघातापासून बचाव करण्यासाठी सूचना दिल्या. “उष्माघात झाल्यास त्वरित डॉक्टरांचा सल्ला घ्यावा. चक्कर येणे, डोकेदुखी, मळमळ किंवा उलट्या होणे ही उष्माघाताची लक्षणे असू शकतात. अशावेळी तातडीने वैद्यकीय मदत घेणे गरजेचे आहे,” असेही ते म्हणाले. जिल्हा प्रशासनाने आरोग्य विभागाने नागरिकांसाठी आवश्यक सूचना जारी केल्या असून, त्या सर्वांनी पाळण्याचे आवाहन जिल्हाधिकाऱ्यांनी केले आहे.
