जळगाव-लाईव्ह ट्रेंड्स न्यूज प्रतिनिधी । जिल्ह्यातील प्रशासनाच्या समस्यांचे त्वरित निराकरण व्हावे आणि विकासकामांना गती मिळावी, यासाठी पालक सचिवांची तातडीने नेमणूक करण्यात यावी, अशी मागणी महाराष्ट्र नवनिर्माण सेनेचे जिल्हाध्यक्ष ॲड. जमील देशपांडे यांनी केली आहे. त्यांनी याबाबत मुख्यमंत्र्यांना ईमेलद्वारे पत्र पाठवले आहे.
देशपांडे यांनी या निवेदनात म्हटले आहे की, पालक सचिव हा जिल्हा आणि मंत्रालय यामधील समन्वय राखणारा महत्त्वाचा दुवा असतो. या अधिकाऱ्यांवर जिल्ह्यातील योजनांची अंमलबजावणी, प्रशासनाच्या कार्यक्षमता वाढवणे, आणि गंभीर समस्यांवर उपाययोजना करण्याची जबाबदारी असते. त्यांना दर तीन महिन्यांतून किमान एक दौरा करणे अपेक्षित आहे. तसेच, जिल्ह्यातील प्रलंबित प्रकरणे मार्गी लावण्यासाठी मंत्रालयाशी समन्वय साधणे, योजनांचा प्रगती अहवाल मुख्य सचिवांना सादर करणे, आणि रोजगार निर्मिती तसेच आरोग्य समस्यांवर उपाययोजना सुचवणे ही त्यांची प्राथमिक जबाबदारी असते.
यात पुढे नमूद केले आहे की, जळगाव जिल्ह्यातील प्रशासकीय कामांना गती मिळण्यासाठी आणि प्रलंबित समस्यांचे निराकरण होण्यासाठी पालक सचिवांची नेमणूक महत्त्वाची आहे. याआधी राजेशकुमार यांना जळगावसाठी पालक सचिव म्हणून नेमले गेले होते, मात्र त्यांनी जिल्ह्याला कधी भेट दिली याबाबत कोणतीही माहिती नाही, अशी खंत जमील देशपांडे यांनी व्यक्त केली आहे.
जळगाव जिल्ह्यात आरोग्य, रोजगार निर्मिती, तसेच योजनांच्या प्रभावी अंमलबजावणीसाठी कार्यक्षम नेतृत्वाची आवश्यकता आहे. पालक सचिवांच्या अनुपस्थितीमुळे विकासकामे थांबली असल्याची तक्रार नागरिकांमधून होत आहे. यामुळे महाराष्ट्र नवनिर्माण सेनेने मुख्यमंत्र्यांना या विषयावर तातडीने लक्ष घालण्याची विनंती केली आहे. पालक सचिवांची त्वरित नेमणूक करून जिल्ह्याच्या प्रशासकीय कार्यक्षमतेला बळ दिले जावे, अशी मागणी करण्यात आली आहे.
