पाचोरा – लाईव्ह ट्रेंड्स न्यूज प्रतिनिधी । राष्ट्रीय स्वयंसेवक संघाच्या शताब्दी महोत्सवानिमित्त पाचोरा शहरात ५ ऑक्टोबर रोजी एक भव्य आणि शिस्तबद्ध पथसंचलन आयोजित करण्यात आले. या पथसंचलनाच्या माध्यमातून शहरात राष्ट्रभक्तीचे आणि संघभावनेचे वातावरण निर्माण झाले. स्थानिक नागरिकांनीही मोठ्या संख्येने या शिस्तबद्ध संचलनाचे दर्शन घेऊन उत्स्फूर्त प्रतिसाद दिला.
सायंकाळी ४ वाजता कृषी उत्पन्न बाजार समितीच्या आवारातून पथसंचलनास सुरुवात झाली. एक भव्य चारचाकी वाहनावर विद्या आणि संस्कृतीची प्रतीक असलेल्या सरस्वती मातेची आकर्षक प्रतिमा लावण्यात आली होती. संचलन मार्गभर सुंदर रांगोळी काढण्यात आली होती, तर स्वयंसेवकांच्या तालीमबद्ध चालीसोबत संघाचे पारंपरिक वाद्यही सतत निनादत होते. पथसंचलनाच्या मार्गावर ठिकठिकाणी उभ्या असलेल्या नागरिकांनी स्वयंसेवकांवर फुलांची उधळण करत उत्साहाने स्वागत केले.
संपूर्ण पथसंचलन कृषी उत्पन्न बाजार समितीपासून सुरू होऊन रेल्वे भुयारी मार्ग, छत्रपती शिवाजी महाराज चौक, हुतात्मा स्मारक, ज्योतीराव फुले स्मारक, डॉ. बाबासाहेब आंबेडकर पुतळा, रेल्वे स्थानक रोड, देशमुखवाडी, आठवडे बाजार, गांधी चौक, सराफ बाजार, जामनेर रोड या प्रमुख मार्गावरून पुनश्च कृषी उत्पन्न बाजार समिती येथे समाप्त झाले. मार्गभर अनुशासित चाल, घोषणांचा जयघोष आणि देशभक्तीपर वातावरण यामुळे शहरात एक उत्सवमय आणि प्रेरणादायी छटा अनुभवायला मिळाली.
पथसंचलनानंतर आयोजित कार्यक्रमात मान्यवरांनी राष्ट्रीय स्वयंसेवक संघाच्या गेल्या १०० वर्षांच्या कार्यपद्धतीवर, राष्ट्रनिर्माणातील योगदानावर आणि सामाजिक समरसतेच्या भूमिकेवर प्रकाशझोत टाकला. संघाच्या कार्यकर्त्यांनी समाजहिताच्या दृष्टीने सातत्याने केलेल्या योगदानाबद्दल गौरवोद्गार काढण्यात आले. या भव्य पथसंचलनात शहरातील विविध वयोगटातील स्वयंसेवकांनी सहभाग नोंदवून एकता, शिस्त आणि राष्ट्रसेवेचा संदेश दिला.
या भव्य पथसंचलनाच्या आयोजनामुळे पाचोरा शहरात राष्ट्रभक्तीचे वातावरण गडद झाले असून, नागरिकांच्या मनात संघाच्या कार्याबद्दल नव्याने आदर निर्माण झाला आहे. संघाच्या शताब्दी महोत्सवाचे हे आयोजन प्रेरणादायी ठरले असून, पुढील पिढीसाठी एक सकारात्मक दिशा देणारे ठरले आहे.
