जळगाव लाईव्ह ट्रेंडस न्यूज प्रतिनिधी । जळगाव शहरातील गोदावरी फाउंडेशनच्या गोदावरी कॉलेज ऑफ इंजिनीअरिंग येथे उद्या, १० मे रोजी सकाळी १० वाजता भव्य रोजगार मेळाव्याचे आयोजन करण्यात आले आहे. यूकेबी इलेक्ट्रॉनिक्स लिमिटेड ही नामांकित कंपनी या मेळाव्यात विविध पदांसाठी भरती करणार आहे.
या रोजगार मेळाव्यात बीई/बी.टेक (मेकॅनिकल, इलेक्ट्रिकल आणि इलेक्ट्रॉनिक्स), डिप्लोमा (मेकॅनिकल, इलेक्ट्रिकल आणि इलेक्ट्रॉनिक्स), कोणतेही पदवीधर, आयटीआय (सर्व ट्रेड्स) आणि बारावी पास उमेदवारांसाठी नोकरीची संधी उपलब्ध आहे.
कंपनीद्वारे निवड झालेल्या उमेदवारांना आकर्षक वेतन दिले जाणार आहे. बीई/बी.टेक उमेदवारांसाठी २०,००० रुपये, डिप्लोमा उमेदवारांसाठी १८,००० रुपये, आयटीआय उमेदवारांसाठी १६,००० रुपये आणि बारावी पास उमेदवारांसाठी १५,००० रुपये प्रति महिना वेतन निश्चित करण्यात आले आहे.
इच्छुक उमेदवारांनी या मेळाव्यात सहभागी होण्यासाठी काही आवश्यक कागदपत्रे सोबत आणणे अनिवार्य आहे. यामध्ये आधार कार्ड, पॅन कार्ड, स्वतःचा बायोडाटा (Resume), सर्व शैक्षणिक प्रमाणपत्रांच्या झेरॉक्स प्रती आणि ४ पासपोर्ट साईज फोटो यांचा समावेश आहे.
यूकेबी इलेक्ट्रॉनिक्स लिमिटेड निवड झालेल्या कर्मचाऱ्यांसाठी अनेक सोयीसुविधा पुरवणार आहे. यामध्ये मोफत वाहतूक, मोफत कॅन्टीन (भोजन), मोफत चहा आणि नाश्ता, तसेच सवलतीच्या दरात निवास (Accommodation) उपलब्ध करून दिला जाणार आहे.
या रोजगार मेळाव्याबद्दल अधिक माहितीसाठी किंवा कोणत्याही शंका असल्यास, इच्छुक उमेदवारांनी प्रशिक्षण आणि प्लेसमेंट अधिकारी डॉ. विजयकुमार वानखेडे यांच्याशी ९३७०३२५२५२ या क्रमांकावर संपर्क साधू शकतात. जळगावातील सुशिक्षित बेरोजगार तरुणांसाठी ही एक उत्तम संधी आहे, त्यामुळे अधिकाधिक युवकांनी या रोजगार मेळाव्याचा लाभ घ्यावा, असे आवाहन आयोजकांनी केले आहे.
