जळगाव लाईव्ह ट्रेंडस न्यूज प्रतिनिधी । जळगाव शहरातील पिंप्राळा हुडको, न्यू ख्वाजा नगरपरिसरात किरकोळ वादातून दोन गट एकमेकांना भिडल्याची धक्कादायक घटना घडली आहे. लहान मुलांचे भांडण आणि दारूच्या नशेत झालेल्या वादाचे रूपांतर मोठ्या हाणामारीत झाले असून, दोन्ही गटांनी एकमेकांवर लोखंडी पाईपने प्राणघातक हल्ला केला. याप्रकरणी रामानंदनगर पोलीस ठाण्यात दोन्ही बाजूंच्या फिर्यादीवरून परस्परविरोधी गुन्हे दाखल करण्यात आले आहेत.
पहिल्या गटाचा आरोप: मुलांच्या भांडणात मध्यस्थी पडली महागात :
पहिल्या घटनेत फिर्यादी उस्मान शहा इब्राहिम शहा वय ५५ यांनी दिलेल्या तक्रारीनुसार, २९ मार्च रोजी रात्री ८ ते ११:३० च्या दरम्यान त्यांच्या मुलाचे आणि आरोपींच्या मुलाचे भांडण झाले होते. हे भांडण सोडवण्यासाठी फिर्यादी महिला आणि त्यांचा मुलगा गेले असता, आरोपी संशयित आरिफ नादर शेख, जुबेर शेख आणि त्यांच्या जावयाने लोखंडी पाईपने त्यांना बेदम मारहाण केली. यात माय-लेकाच्या डोक्याला गंभीर दुखापत झाली असून त्यांना जळगाव सिव्हिल हॉस्पिटलमध्ये दाखल करण्यात आले आहे.
दुसऱ्या गटाचा प्रतिआरोप: दारूच्या नशेत नातेवाईकांवर हल्ला :
दुसरीकडे, जुबेर शेख हकीम यांनी दिलेल्या फिर्यादीनुसार, त्याच वेळी संशयित आरोपी आरोफा शहा, शहनाद शहा, जाफर शहा आणि उस्मान शहा यांनी दारूच्या नशेत नातेवाईकांना शिवीगाळ करण्यास सुरुवात केली. जेव्हा जुबेर शेख हकीम व त्यांचे मामा समजावण्यासाठी गेले, तेव्हा आरोपींनी लोखंडी पाईपने त्यांच्या डोक्यावर वार करून त्यांना जखमी केले. याही घटनेत जुबेर आणि त्यांच्या मामाला गंभीर दुखापत झाली असून त्यांनाही उपचारासाठी रुग्णालयात हलवण्यात आले आहे.
पोलीस कारवाई आणि गुन्ह्याची व्याप्ती :
या दोन्ही घटना एकाच ठिकाणच्या आणि एकाच वेळेच्या असल्याने रामानंदनगर पोलिसांनी दोन्ही गटांविरुद्ध गुन्हे दाखल केले आहेत. दोन्ही बाजूंच्या हल्ल्यात लोखंडी पाईपचा वापर करण्यात आल्याचे प्राथमिक तपासात समोर आले आहे. सध्या या प्रकरणात कोणालाही अटक करण्यात आलेली नाही. पोलीस हवालदार योगेश माळी या प्रकरणाचा सखोल तपास करत आहेत.
