जळगाव-लाईव्ह ट्रेंड्स न्यूज प्रतिनिधी । अनुसूचित जमातीतील सुशिक्षित बेरोजगार युवक-युवतींसाठी स्पर्धा परीक्षांच्या तयारीची सुवर्णसंधी उपलब्ध झाली असून रावेर येथील कौशल्य विकास, रोजगार व उद्योजकता माहिती व मार्गदर्शन केंद्राच्या वतीने मोफत प्रशिक्षण कार्यक्रमाची घोषणा करण्यात आली आहे.
या उपक्रमांतर्गत १ एप्रिल २०२६ ते १५ जुलै २०२६ या कालावधीत साडेतीन महिन्यांचे सर्वसमावेशक प्रशिक्षण दिले जाणार आहे. या प्रशिक्षणात विविध शासकीय व निमशासकीय भरती प्रक्रियांमध्ये विचारल्या जाणाऱ्या स्पर्धा परीक्षांचा सखोल अभ्यास करून उमेदवारांना सक्षम बनविण्याचा प्रयत्न केला जाणार आहे. त्यामुळे ग्रामीण व आदिवासी भागातील विद्यार्थ्यांना स्पर्धात्मक परीक्षांमध्ये यश मिळविण्यासाठी भक्कम पाया मिळणार आहे.
प्रशिक्षणादरम्यान पात्र प्रशिक्षणार्थींना उपस्थितीनुसार दरमहा १००० रुपये विद्यावेतन देण्यात येणार असून प्रशिक्षण पूर्ण केल्यानंतर चार पुस्तकांचा संच तसेच अधिकृत प्रमाणपत्र देण्यात येणार आहे. यामुळे आर्थिकदृष्ट्या दुर्बल घटकांतील विद्यार्थ्यांना मोठा आधार मिळणार असल्याचे सांगितले जात आहे.
या प्रशिक्षणासाठी अर्ज करू इच्छिणाऱ्या उमेदवारांनी www.rojgar.mahaswayam.gov.in या संकेतस्थळावर नोंदणी करणे अनिवार्य आहे. निवड प्रक्रिया मुलाखतीच्या आधारे होणार असून या मुलाखती २५ मार्च २०२६ रोजी सकाळी १० वाजता आयोजित करण्यात आल्या आहेत. त्यामुळे इच्छुकांनी वेळेत नोंदणी करून उपस्थित राहण्याचे आवाहन करण्यात आले आहे.
प्रवेशासाठी उमेदवार अनुसूचित जमाती प्रवर्गातील असावा, महाराष्ट्राचा रहिवासी असावा, किमान दहावी उत्तीर्ण असणे आवश्यक आहे तसेच वय १८ वर्षे पूर्ण असावे, अशी अट घालण्यात आली आहे. मुलाखतीसाठी येताना शाळा सोडल्याचा दाखला, शैक्षणिक गुणपत्रिका, आधार कार्ड, बँक पासबुक, दोन पासपोर्ट फोटो आणि जातीचा दाखला यांचे मूळ व छायांकित प्रती सोबत आणणे बंधनकारक आहे. प्रशिक्षण कालावधीत निवास व भोजनाची व्यवस्था उमेदवारांनी स्वतः करायची आहे.
अधिक माहितीसाठी इच्छुकांनी कौशल्य विकास, रोजगार व उद्योजकता माहिती व मार्गदर्शन केंद्र, प्लॉट क्रमांक २, शनि मंदिरामागे, स्टेशन रोड, पंचायत समिती जवळ, रावेर येथे संपर्क साधावा किंवा ०२५८४-२५१९०६ या दूरध्वनी क्रमांकावर संपर्क करावा, असे आवाहन करण्यात आले आहे.
