जळगाव-लाईव्ह ट्रेंडस न्यूज प्रतिनिधी । जळगाव येथील गोदावरी इंग्लिश मीडियम सीबीएसई स्कूलमध्ये नुकताच “वन महोत्सव सप्ताह” मोठ्या उत्साहात साजरा करण्यात आला. पर्यावरणाचे संरक्षण आणि वृक्षारोपणाचे महत्त्व विद्यार्थ्यांच्या मनात रुजवण्यासाठी या सप्ताहात विविध उपक्रमांचे आयोजन करण्यात आले होते.
या सप्ताहात विद्यार्थ्यांनी “गो ग्रीन” या संकल्पनेवर आधारित आकर्षक नाटिका सादर केल्या. तसेच सॉफ्टबोर्ड डेकोरेशन स्पर्धा आयोजित करण्यात आली होती. या नाटिका आणि स्पर्धांमधून वनमहोत्सवाचे महत्त्व, निसर्गाची अनमोल देणगी, जंगलतोडीचे दुष्परिणाम आणि पर्यावरण रक्षणाची गरज असे महत्त्वपूर्ण संदेश प्रभावीपणे देण्यात आले.
याचबरोबर, औद्योगिक वसाहतीतील अनेक ठिकाणी वृक्षारोपण उपक्रम राबवण्यात आला. यात विद्यार्थी, शिक्षक आणि पालक यांनी मोठ्या उत्साहाने सहभाग घेतला. शाळेच्या प्राचार्या सौ. नीलिमा चौधरी यांच्या मार्गदर्शनाखाली शाळेच्या परिसरात विविध प्रकारची झाडे लावून “एक विद्यार्थी — एक वृक्ष” ही संकल्पना यशस्वीपणे राबवण्यात आली.
सोशल सायन्स क्लबच्या प्रमुख सौ. चंद्रकला सोनवणी आणि त्यांच्या टीमने या उपक्रमांचे यशस्वी आयोजन केले. या प्रयत्नांमुळे विद्यार्थ्यांमध्ये पर्यावरणाविषयी अधिक जागरूकता निर्माण झाली. ज्या विद्यार्थ्यांनी या उपक्रमांमध्ये उत्कृष्ट कामगिरी केली, त्यांना प्रमाणपत्र देऊन गौरवण्यात आले. या उपक्रमांमुळे विद्यार्थ्यांमध्ये पर्यावरणाविषयीची जाणीव वाढण्यास निश्चितच मदत झाली.
