मुक्ताईनगर-लाईव्ह ट्रेंडस न्यूज प्रतिनिधी । मुक्ताईनगर शहरातील अवजड वाहतुकीमुळे त्रस्त झालेल्या नागरिकांना अखेर दिलासा मिळाला आहे. रहिवाशांच्या सातत्यपूर्ण तक्रारींची दखल घेत, पोलीस प्रशासनाने शहरात येणारी अवजड वाहने आता शहराबाहेरून वळवण्याचा महत्त्वपूर्ण निर्णय घेतला आहे.
गेल्या काही दिवसांपासून, विशेषतः एकादशीसारख्या महत्त्वाच्या दिवशीही, शहरातून अवजड वाहनांची अनियंत्रित वाहतूक सुरू होती. यामुळे वारकरी, स्थानिक नागरिक आणि पादचाऱ्यांना मोठ्या त्रासाला सामोरे जावे लागत होते. “एखादा मोठा अपघात झाल्यावरच प्रशासनाला जाग येणार का?” असा संतप्त सवाल नागरिकांकडून विचारला जात होता, आणि त्यांनी याबाबत प्रशासनाकडे वारंवार तक्रारी केल्या होत्या.
नागरिकांच्या या तक्रारींची गंभीर दखल घेत पोलीस प्रशासनाने तातडीने कार्यवाही करण्याचे आश्वासन दिले आहे. यानुसार सकाळी ६ ते संध्याकाळी ७ वाजेपर्यंत पुरणार फाटा आणि बोदवड चौफुली या ठिकाणी योग्य तो पोलीस बंदोबस्त तैनात करण्यात येणार आहे. यामुळे अवजड वाहने शहरात प्रवेश न करता, थेट शहराबाहेरून वळवली जातील.
या निर्णयामुळे मुक्ताईनगरमधील वाहतूक कोंडीची समस्या कमी होण्यास मदत होणार असून, अपघातांचा धोकाही लक्षणीयरीत्या कमी होईल अशी अपेक्षा आहे. प्रशासनाने नागरिकांच्या मागणीला प्रतिसाद दिल्याबद्दल मुक्ताईनगरकरांनी समाधान व्यक्त केले आहे.
