एरंडोल–लाईव्ह ट्रेंड्स न्यूज प्रतिनिधी । एरंडोल आणि पद्मालय या ऐतिहासिक स्थळांच्या नावांतील चुकीची नोंद अखेर दुरुस्त करण्यात आली आहे. राष्ट्रीय महामार्ग क्र. ६ वरील दिशादर्शक फलकांवर आता या दोन गावांची अचूक नावे प्रदर्शित होत असून, स्थानिक नागरिकांमध्ये आनंदाचे वातावरण निर्माण झाले आहे. ॲड. आकाश महाजन यांच्या सातत्यपूर्ण पाठपुराव्याला अखेर यश मिळाले आहे.
या प्रकरणात ॲड. आकाश महाजन यांनी भारतीय राष्ट्रीय राजमार्ग प्राधिकरण (NHAI) मुख्यालय दिल्ली तसेच जळगाव युनिटकडे लेखी निवेदन सादर केले होते. त्यांनी आपल्या निवेदनात नमूद केले होते की, महामार्गावर झळकणाऱ्या फलकांवर “एरंडोळ” आणि “पद्माळय” अशी चुकीची नावे असल्यामुळे प्रवाशांमध्ये गोंधळ निर्माण होत आहे. या त्रुटीमुळे एरंडोल आणि पद्मालय या ऐतिहासिक आणि धार्मिक स्थळांच्या योग्य ओळखीला बाधा पोहोचत होती.
या विषयावर NHAI विभागाने सकारात्मक प्रतिसाद देत त्वरित दुरुस्तीची प्रक्रिया सुरू केली. काही दिवसांतच जुन्या चुकीच्या फलकांच्या जागी नवीन दिशादर्शक फलक बसवण्यात आले असून त्यावर आता “एरंडोल” आणि “पद्मालय” अशी अचूक नावे झळकत आहेत. यामुळे प्रवाशांना आता योग्य दिशादर्शन मिळणार आहे.
स्थानिक नागरिकांनी या निर्णयाचे स्वागत करत ॲड. आकाश महाजन यांचे आभार मानले आहेत. “आमच्या गावांची खरी ओळख आता योग्यरीत्या झळकू लागली आहे, हे आमच्यासाठी अभिमानास्पद आहे,” अशी भावना नागरिकांनी व्यक्त केली. या उपक्रमामुळे केवळ गावांची ओळख सन्मानाने जपली गेली नाही, तर प्रशासकीय दृष्टीने एक चांगला संदेशही देण्यात आला आहे.
एकूणच, स्थानिक पातळीवरील जागरूकतेतून आणि तातडीच्या प्रशासकीय प्रतिसादातून “एरंडोल” व “पद्मालय” या गावांची खरी ओळख पुन्हा उजळून निघाली आहे. हे उदाहरण नागरिक सहभाग आणि प्रशासनातील समन्वयाचे आदर्श दर्शन घडवणारे ठरले आहे.
