जळगाव लाईव्ह ट्रेंडस न्यूज प्रतिनिधी । जळगाव शहरातील कालिंकामाता चौकात भरधाव डंपरच्या धडकेत ९ वर्षीय चिमुकल्याचा जागीच मृत्यू झाल्याची घटना बुधवारी २५ डिसेबर रोजी सायंकाळी ७ वाजता घडली होती. या गुन्ह्यातील डंपर चालक आणि मालक या दोघांना अटक करण्यात आली असून एमआयडीसी पोलीस ठाण्यात गुन्हा दाखल करण्यात आला आहे.
अधिक माहिती अशी की, योजेस धीरज बऱ्हाटे (वय ९) हा मुलगा आपल्या मामा योगेश बेंडाळे यांच्या सोबत बुधवारी २५ डिसेंबर रोजी सायंकाळी ७ वाजेच्या सुमारास जेवणाचे पार्सल घेण्यासाठी दुचाकी (एमएच १९ बीवाय ३५९३) ने अयोध्यानगरकडून शहरात येत होता. त्यावेळी त्यांच्या दुचाकीवर त्याची बहिण भक्ती ही देखील होती. त्यावेळी जळगाव शहरातील कालिंकामाता मंदीराजवळील चौकातून जात असतांना मागून भरधाव वेगाने येणारा विना क्रमांकाचा डंपरने जोरदार धडक दिली. या भीषण अपघातात योजस हा बालक डंपरच्या पुढच्या चाकाखाली आल्याने त्याचा जागीच अंत झाला. तर सोबत असलेले त्याचे मामा योगेश आणि बहिण भक्ती हे किरकोळ जखमी झाली. यावेळी संतप्त नागरीकांनी डंपर पेटवून दिला. त्यानंतर तणावाचे वातावरण निर्माण झाले होते. यावेळी नागरीकांना पांगविण्यासाठी पोलीसांनी सौम्य लाठी चार्ज केल्याचे पहायला मिळाले. यावेळी मयत मुलाच्या नातेवाईकांनी एकच आक्रोश केला होता. याप्रकरणी बेंडाळे यांनी दिलेल्या फिर्यादीवरून डंपर चालक शुभम भोलाणे रा. वाजोळा ता. भुसावळ आणि डंपर चालक आकाश बोरसे रा. कांचन नगर, जळगाव या दोघांवर गुन्हा दाखल करण्यात आला. गुन्हा दाखल झाल्यानंतर दोघांना अटक करण्यात आली आहे. पुढील तपास पोलीस निरीक्षक संदीप पाटील हे करीत आहे.
